شاہ فیصل کالونی میں گھر کی دیوار گرنے سے 2 بچے جاں بحق

کراچی کے علاقے شاہ فیصل کالونی میں ہلکی بارش کے دوران گھر کی دیوار گرنے سے 2 کمسن بچے جاں بحق ہو گئے۔

ڈپٹی سپرنٹنڈنٹ پولیس (ڈی ایس پی) سید علی رضا کے مطابق واقعہ شاہ فیصل کالونی نمبر 3 میں قائد پارک کے قریب پیش آیا۔

سید علی رضا کے مطابق پارک کے قریب بچے گلی میں کھیل رہے تھے، اس دوران ہلکی بارش بھی ہو رہی تھی کہ گھر کی دیوار گرنے سے 7 سالہ بچی ارحم شمیم اور 8 سالہ لڑکا حاطر شفیق ملبے تلے دب کر شدید زخمی ہوگئے۔

ڈی ایس پی علی رضا کے مطابق زخمیوں کو فوری طور پر آمنہ ویلفیئر کے رضا کاروں نے اہل محلہ کی مدد سے نکالا اور فوری طور پر جناح اسپتال منتقل کیا۔

ڈاکٹرز کے مطابق اسپتال لائے جانے تک بچوں کی موت واقع ہو چکی تھی۔

کورنگی پولیس کے مطابق اس سلسلے میں کارروائی اور تفتیش کی جا رہی ہے۔

بشکریہ جنگ