بالوں کو قبل از وقت سفید ہونے سے بچائیں

عمر بڑھنے کے ساتھ ساتھ بالوں کا سفید ہونا ایک قدرتی عمل ہے جس سے بچنا کسی کے لیے بھی ممکن نہیں ہے، مگر آج کل مشاہدے میں آیا ہے کہ ایسے افراد کی تعداد بھی بہت زیادہ ہے جن کے بال مختلف وجوہات کی وجہ سے جوانی میں ہی یا قبل از وقت سفید ہونے لگتے ہیں۔

ایسے افراد جو قبل از وقت سفید بالوں کے مسلئے سے دوچار ہیں وہ درجہ ذیل اشیاء کے استعمال سے اس عمل کو سست کر سکتے ہیں۔

سبز پتوں والی سبزیوں کا شمار کروسیفیرس (cruciferous) سبزیوں کے گروپ میں ہوتا ہے، اس گروپ میں پالک، گوبھی، بروکولی، بند گوبھی وغیرہ شامل ہیں، یہ سبزیاں آئرن، فولک ایسڈ، وٹامنز، کیلشیم اور دیگر غذائی اجزاء سے بھرپور ہوتی ہیں جو بالوں کی صحت کو بہتر بناتے ہیں۔

ڈارک چاکلیٹ کو سپر فوڈ بھی کہا جاتا ہے جو مختلف غذائی اجزاء خصوصاً اینٹی آکسیڈنٹس سے بھرپور ہوتی ہے، اینٹی آکسیڈنٹس جسم سے ایسے زہریلے مادوں کو صاف کرنے میں مدد کرتے ہیں جو آپ کے بالوں کے وقت سے پہلے سفید ہونے کا سبب بن سکتے ہیں، اس میں کوپر کی مقدار زیادہ ہوتی ہے جو میلانین کی پیداوار میں مدد کرتا ہے۔

دودھ اور اس سے تیار شدہ مصنوعات جیسے پنیر، دہی وغیرہ وٹامن بی 12، کیلشیئم، پروٹین اور دیگر مختلف غذائی اجزاء سے بھرپور ہوتے ہیں جو میلانین کی پیداوار میں مدد دیتے ہیں، خاص طور پر پروبائیوٹک اور اینٹی آکسیڈنٹس سے بھرپور دہی بالوں کی بہتر صحت اور میلانین کی پیداوار میں معاون ہے۔

انڈوں میں پروٹین وافر مقدار میں پایا جاتا ہے جس کی ضرورت ہمارے جسم کو بالوں کی اچھی صحت برقرار رکھنے میں ہوتی ہے، یہ وٹامن بی 12 سے بھی بھرپور ہوتا ہے جس کی کمی کا تعلق وقت سے پہلے بالوں کے سفید ہونے سے ہے، چاہے پورے انڈے کا استعمال نہ کیا جائے صرف سفیدی کا استعمال بھی اس کمی کو پورا کرنے کے لیے کافی ہے۔

سویابین ایک غذائیت سے بھرپور ہے، اس سے حاصل کردہ دودھ، جانوروں سے حاصل کردہ دودھ کے متبادل کے طور پر بھی استعمال کیا جاسکتا ہے، جس سے پروٹین حاصل ہوتا ہے، تاہم سویابین میں متعدد دیگر غذائی اجزاء بھی وافر مقدار میں پائے جاتے ہیں، یہ اینٹی آکسیڈنٹس بھی ہے اور بالوں میں قبل از وقت سفیدی پیدا کرنے والے ریڈیکلز سے لڑنے میں مدد فراہم کرتا ہے۔

دالیں وٹامن بی 9 اور دیگر مختلف غذائی اجزاء کا بہترین ذریعہ ہیں جو ہمارے بالوں کی اچھی صحت کو برقرار رکھتے ہیں، دالوں کو مختلف طریقوں سے پکایا جا سکتا ہے جس سے انہیں اپنی روزمرہ کی خوراک میں شامل کرنا آسان ہو جاتا ہے۔

مشروم میں کاپر وافر مقدار میں پایا جاتا ہے جیسا کہ اوپر بتایا گیا ہے کہ تانبا میلانین کی پیداوار میں مدد کرتا ہے، میلانین بالوں کے ساتھ ساتھ جِلد کو رنگ دینے کے لیے ذمے دار روغن کا جزو بھی ہے، میلانین کی کمی بالوں کے سفید ہونے کو تیز کر سکتی ہے۔

خمیر شدہ کھانے ان لوگوں کے لیے بہترین ہیں جو قبل از وقت بالوں کی سفیدی کا سامنا کرتے ہیں، خمیر شدہ کھانے جیسے دہی، اچار اور دیگر پروبائیوٹک غذائیں بہتر ہاضمے کو یقینی بناتی ہیں، بہتر ہاضمہ جسم میں بایوٹین کی سطح کو بہتر بناتا ہے، بایوٹین کا جزو براہِ راست ہمارے بالوں، جلد اور ناخنوں کی صحت کو بہتر بناتا ہے۔

بشکریہ جنگ