کراچی کو دی گئی رقم جعلی اکاؤنٹس میں منتقل ہوئی: عمران خان

چیئرمین پی ٹی آئی، سابق وزیرِ اعظم عمران خان کا کہنا ہے کہ کراچی کو دی گئی رقم جعلی اکاؤنٹس میں منتقل ہوئی۔

اسلام آباد سے جاری کیے گئے بیان میں یہ بات چیئرمین پی ٹی آئی عمران خان نے کہی ہے۔

ان کا کہنا ہے کہ سندھ میں طوفانی بارشوں نے پیپلز پارٹی حکومت کی قلعی کھول دی ہے، سندھ کے عوام پانی میں اور زرداری خاندان کرپشن کے سمندر میں غوطے کھا رہا ہے۔

عمران خان بارہا اپنی تقاریر اور بیانات میں کارکنوں کے پُرتشدد رویے کی حوصلہ افزائی کرتے رہے ہیں۔

عمران خان کا مزید کہنا ہے کہ بارش نے ایک بار پھر زرداری خاندان کی 14 سالہ کرپٹ حکمرانی کو بے نقاب کر دیا، یہ ایک بہترین مثال ہے کہ کس طرح کرپشن گورننس کو برباد کر دیتی ہے۔

سابق وزیرِ اعظم کا یہ بھی کہنا ہے کہ کراچی کو دی گئی یہ رقم دبئی کی جائیدادوں میں لگائی گئی، برائی کے اس گٹھ جوڑ کو اب ختم کیا جانا چاہیے۔

بشکریہ جنگ