سری لنکن وزیراعظم نے ملک کے دیوالیہ ہونے کا اعتراف کر لیا

کئی ماہ سے بد ترین معاشی بحران کا شکار سری لنکا نے دیوالیہ ہونے کا اعتراف کرلیا۔

پارلیمنٹ سے خطاب میں سری لنکن وزیراعظم رانیل وکرما سنگھے کا کہنا تھا کہ سری لنکا دیوالیہ ہو گیا ہے، معاشی بحران اگلے سال کے آخر تک جاری رہنے کا خدشہ ہے۔

آئی ایم ایف نے مالیاتی بحران کے شکار سری لنکا کو بیل آوٹ پیکج سے پہلے کرپشن کم کرنے، ٹیکسوں میں اضافہ اور ایندھن پر سبسڈی ختم کرنے کا مطالبہ کر دیا۔

انہوں نے کہا کہ ملک میں اس سال شدید کساد بازاری ہو جائے گی جبکہ خوراک، ایندھن اور دواؤں کی قلت برقرار رہے گی، ہم 2023 میں بھی مشکلات کا شکار رہیں گے۔

سری لنکن وزیراعظم کا کہنا تھا کہ آئی ایم ایف سے مذاکرات میں بطور دیوالیہ ملک شریک ہیں، دیوالیہ پن کی وجہ سے آئی ایم ایف کو قرضوں کی پائیداری سے متعلق ہمیں ایک الگ منصوبہ دینا ہوگا۔

انہوں نے مزید کہا کہ آئی ایم ایف اس منصوبے سے مطمئن ہوگا تو ہم اگست تک کسی معاہدے تک پہنچ سکتے ہیں، آئی ایم ایف نے گزشتہ ہفتے سری لنکا سے معاہدے میں مزید کام ہونے کا کہا تھا۔

بشکریہ جنگ