سندھ، عدالت کا محکمہ صحت کو ڈاکٹر عامر لیاقت کے پوسٹ مارٹم کے انتظامات کا حکم

جوڈيشل مجسٹريٹ نے سیکريٹری صحت سندھ کوخط تحریر کرکے عامر لیاقت حسین کے پوسٹ مارٹم کیلئے انتظامات کرنے کا حکم دے دیا۔

کراچی سٹی کورٹ میں جوڈیشل مجسٹریٹ شرقی کی عدالت میں عامر لیاقت حسین کے پوسٹ مارٹم کیلئے شہری کی دائر درخواست پر سماعت میں لاش کے پوسٹ مارٹم کا حکم جاری کیا گیا تھاجس کے بعد اب عدالت نے محکمہ صحت سندھ کو اس حوالے سے انتظامات کا بھی حکم دے دیا ہے۔

تفصیلات کے مطابق جوڈيشل مجسٹريٹ نےسیکريٹری صحت سندھ کوخط لکھا ہے جس میں ہدايت کی گئی ہے کہ مرحوم ڈاکٹرعامرلياقت حسین کا پوسٹ مارٹم کرنے کے لئے تاریخ مقررکی جائے اور پوسٹ مارٹم کے لئے میڈیکل بورڈ بنایا جائے۔

واضح رہے کہ اینکرپرسن، ایم این اے عامر لیاقت 9 جون کو مبینہ طور پر اپنے کمرے میں مردہ حالت میں پائے گئے تھے۔ ملازمین کی اطلاع پر عامر لیاقت کو اسپتال منتقل کیا گیا تھا جہاں ان کی موت کی تصدیق کی گئی تھی۔

ان کی نماز جنازہ بھی پوليس کی جانب سے پوسٹ مارٹم کروانے کے اصرار کی وجہ سے تاخير کا شکار ہوئی تھی، پوليس حکام کا موقف تھا کہ موت کی وجہ کا تعين نہ ہونے کی وجہ سے پوسٹ مارٹم ضروری ہے۔

عامر لیاقت کے انتقال کے دوسرے دن اُن کی تدفین وصیت کے مطابق عبداللّٰہ شاہ غازی کے مزار کے احاطے میں کی گئی تھی۔

بشکریہ جنگ