قومی اسمبلی سے استعفے دے دیے، فوری منظور کیے جائیں، پرویز خٹک

پاکستان تحریک انصاف (پی ٹی آئی) کے رہنما پرویز خٹک نے کہا ہے کہ ہم نے قومی اسمبلی سے استعفے دے دیے ہیں، واپسی کا کبھی سوچا بھی نہیں۔

پارلیمنٹ ہاؤس میں میڈیا سے گفتگو کرتے ہوئے سابق وزیر دفاع نے کہا کہ قومی اسمبلی میں واپسی کا نہ سوچا ہے نہ کبھی سوچیں گے۔

ان کا کہنا تھا کہ اسمبلی میں کھڑے ہو کر مستعفی ہونے کے اعلان کے بعد تصدیق کی ضرورت نہیں ہوتی۔

انہوں نے کہا کہ مستعفی ہونے سے متعلق قانون اور مثال موجود ہے، ملتان کے رکن کے مستعفی ہونے کی مثال موجود ہے۔

رہنما پی ٹی آئی پرویز خٹک نے کہا کہ ہمارے استعفے فوری منظور کیے جائیں، کسی کو شک نہیں ہونا چاہیے۔

انہوں نے مزید کہا کہ حکومت ڈرامہ کر رہی ہے جو پہلے بھی ایک دفعہ کیا تھا۔

بشکریہ جنگ