وزیر خزانہ نے پیٹرول مزید مہنگا ہونے کی خبر سُنا دی

وفاقی وزیر خزانہ مفتاح اسماعیل نے آنے والے دنوں میں پیٹرول مزید مہنگا ہونے کی خبر سُنا دی۔

جیو نیوز کے پروگرام ’کیپٹل ٹاک‘ میں گفتگو کرتے ہوئے مفتاح اسماعیل نے کہا کہ تحریک انصاف حکومت نے آئی ایم ایف سے جو معاہدے سائن کیے ہیں وہ پاکستان کے حق میں بہتر نہیں ہیں، اِس لیے وہ آئی ایم ایف سے معاہدے تبدیل کرنے کا کہہ رہے ہیں۔

مفتاح اسماعیل نے کہا کہ ہم امپورٹڈ نہیں اسی ملک میں پیدا ہوئے اور یہیں مریں گے، میرا مقصد آئی ایم ایف کی خوشنودی حاصل کرنا نہیں، اس وقت آئی ایم ایف پروگرام میں جانا ضروری ہے، آئی ایم ایف نے کہا پیٹرول پر سبسڈی ختم کریں۔

وزیر خزانہ نے کہا کہ آئی ایم ایف کے ساتھ پی ٹی آئی بولتی کچھ اور تھی اور کرتی کچھ اور تھی، آئی ایم ایف کے ساتھ بات چیت ہورہی ہے، آئی ایم ایف کے ساتھ جلد معاہدہ ہوجائے گا، پھر چیزیں بہتر ہونا شروع ہوجائیں گی۔

مفتاح اسماعیل نے کہا کہ چین سے اگر پیسے آجائیں گے تو اعتماد بحال ہوگا، دوست ممالک کے پیسوں سے ملک نہیں چلتے، اس ملک میں اسٹرکچرل مسائل ہیں۔

انہوں نے کہا کہ کےالیکٹرک کے لوگوں سے ملاقات کی، آج بھی وہ وہی بات کر رہے تھے جو 4 سال پہلے کر رہے تھے، مسائل ہوتے ہیں کوئی حل ہی نہیں کرتا، مہنگائی کی شرح  25 سے 30 فیصد تک نہیں جائے گی۔

مفتاح اسماعیل نے کہا کہ یوکرین جنگ کی وجہ سے دنیا میں تیل اور گندم بہت مہنگی ہوگئی ہے، عمران خان کو یقین تھا کہ ان کی چھٹی ہونے والی ہے، اس لیے انہوں نے لمبا شارٹ کھیلا۔

وزیر خزانہ نے کہا کہ ہم نے ریٹیلرز پر ٹیکس عائد کردیا ہے، ہم دکانداروں کو ٹیکس نیٹ میں لا رہے ہیں، پاکستان میں ہر آدمی ٹیکس دیتا ہے، ملک میں پراپرٹی پر ٹیکس نہیں لیا جاتا۔

مفتاح اسماعیل نے کہا کہ دو تین ماہ میں مہنگائی کا مسئلہ کنٹرول کرلیں گے۔

بشکریہ جنگ