عامر لیاقت کی موت پر دانیہ ملک کی والدہ کا موقف سامنے آگیا

معروف ٹی وی میزبان اور رکن قومی اسمبلی عامر لیاقت کی موت پر ان کی تیسری بیوی دانیہ ملک کی والدہ سلمیٰ بیگم کا موقف بھی سامنے آگیا ہے۔

سلمیٰ بیگم  نے جیونیوز سے گفتگو کرتے ہوئے کہا کہ عامر لیاقت کی اچانک وفات کا سن کر افسوس ہوا، تین، چار دن پہلے عامر لیاقت کا صلح کے لیے فون آیا تھا۔

سلمیٰ بیگم نے کہا کہ خلع کے کیس کے بعد عامر لیاقت شروع دن سے صلح کرنا چاہتے تھے، میں نے کہا کہ معاملہ کافی بگڑ گیا ہے، پہلے اپنے آپ کو سنبھالو پھر دیکھیں گے، عامر لیاقت صلح کا سن کر کافی خوش تھے، کہا گاؤں میں آکر معافی مانگوں گا۔

انہوں نے کہا کہ طلاق نہیں ہوئی تھی، عدالت بھی صلح کا موقع دیتی ہے، پولیس ہم سے کیا تفتیش کرے گی، کیا ہم عامر لیاقت کے ساتھ رہتے تھے؟ ہم کوئی بڑے لوگ نہیں جو عامر لیاقت پر دباؤ ڈالتے، عامر لیاقت نے ہمیں ٹارچر کیا اور دباؤ ڈالا تھا۔

دانیہ ملک کی والدہ نے کہا کہ اگر حکومت سیکیورٹی دے گی تو عامر لیاقت کی تدفین پر کراچی جائیں گے، وہ ہمارا بیٹا تھا، ہمارا داماد تھا اور ابھی تک دانیہ اس کے نکاح میں ہے۔

واضح رہے کہ رکنِ قومی اسمبلی عامر لیاقت حسین کی تیسری بیوی، دانیہ شاہ نے تنسیخ نکاح اور 11 کروڑ 51 لاکھ، 50 ہزار روپے حق مہر کا بھی دعویٰ دائر کر رکھا ہے۔

عامر لیاقت کی اہلیہ دانیہ شاہ کی جانب سے ایک لاکھ روپے ماہانہ بطور نان نفقہ کا بھی دعویٰ دائر کیا گیا تھا۔

یاد رہے کہ عامر لیاقت حسین نے رواں سال کے آغاز میں لودھراں سے تعلق رکھنے والی 18 سالہ دانیہ ملک سے تیسری شادی کی تھی۔

بشکریہ جنگ