شیرانی کے جنگلات میں لگی آگ سے آبادی کو کوئی خطرہ نہیں، کنزرویٹر محکمہ جنگلات

کنزرویٹر محکمہ جنگلات امین مینگل کا کہنا ہے کہ بلوچستان کے علاقے شیرانی کے قدیم جنگلات میں لگی آگ سے آبادی کو کوئی خطرہ نہیں۔

کوئٹہ میں میڈیا سے گفتگو کرتے ہوئے امین مینگل نے کہا کہ  آگ سے ممکنہ طور پر متاثر ہونے والے7 گھرانوں کو محفوظ مقام پر منتقل کیا جارہا ہے۔

محکمہ جنگلات کے کنزرویٹر کا کہنا تھا کہ شیرانی کے جنگلات میں آگ پر کنٹرول کے لیے کوششیں کی جارہی ہیں، آگ 10ہزار 700 ایکٹر کے رقبے پر پھیلی ہوئی ہے۔

انہوں نے مزید کہا کہ کوہ سلیمان رینج میں زرغون زور کے مقام پر آگ کو بڑھنے سے روک دیا ہے، آگ پر قابو پانے کیلئے زرغون زور تک 9 کلومیٹر کی فائرلائن بنادی ہے۔

ان کا یہ بھی کہنا تھا کہ آگ سے تورغر، چمازئی، شرغلئی اور زرغون زور میں جنگلات کو کافی نقصان پہنچا، جس سے چلغوزے، زیتون کے جنگلات، مارخور اور پرندوں سمیت جنگلی حیات متاثر ہوئی ہے۔

امین مینگل نے کہا کہ آگ بجھانے کے آپریشن میں پی ڈی ایم اے اور این ڈی ایم اے کی ٹیم بھی حصہ لے رہی ہے۔

خیال رہے کہ 9 مئی کو مغل کوٹ کے جنگلات سے شروع ہونے والی آگ شیرانی کے جنگلات تک پھیل چکی ہے۔

جنگل، جنگلی حیات اور مقامی آبادی کے تحفظ کے لئے فارسٹ رینجز زونز میں دفعہ 144نافذ کرکے فارسٹ رینجز اور زون میں آگ جلا کر پکنک منانے سمیت ہر قسم کی عوامی سرگرمیوں پر پابندی عائد کردی گئی ہے۔

صوبائی محکمہ داخلہ نے پابندی سےمتعلق اعلامیہ جاری کردیا، آگ کی وجہ سے اٹھنے والا دھواں کئی کلومیٹر سے دیکھا جا سکتا ہے۔

بشکریہ جنگ