’’ہمیں آج ہی اٹھوا لیں‘‘، شیخ رشید کا رانا ثناء کو جواب

سابق وفاقی وزیرِ داخلہ شیخ رشید احمد نے موجودہ وفاقی وزیرِ داخلہ رانا ثناء اللّٰہ کو جواب دیتے ہوئے کہا ہے کہ ہمیں آج ہی اٹھوا لیں۔

شیخ رشید احمد لاہور ہائی کورٹ راولپنڈی بینچ میں ضمانتی مچلکے جمع کرانے پہنچ گئے۔

اس موقع پر میڈیا سے گفتگو کرتے ہوئے انہوں نے وفاقی وزیرِ داخلہ کے بیان پر اپنے ردِ عمل کا اظہار کیا۔

وفاقی وزیرِ داخلہ رانا ثناء اللّٰہ نے اپنے سابق ہم منصب کے حوالے سے کہا ہے کہ لانگ مارچ کو خونی کہنے والا بیان واپس نہ لیا اور اسے پُرامن نہ کہا تو میں شیخ رشید کو گھر سے نہیں نکلنے دوں گا۔

انہوں نے کہا کہ پاکستان تحریکِ انصاف سے میرا تعلق نہیں، عمران خان کو سپورٹ کرتا ہوں۔

شیخ رشید نے کہا کہ ان کے چہرے دیکھیں، یہ کہتے ہیں کہ گھروں سے نکال کر ماریں گے، سب جھوٹے مقدمات بنائے جا رہے ہیں مگر کوئی گھبراہٹ نہیں۔

ان کا کہنا ہے کہ جتنی گرفتاریاں کرنی ہیں کر لیں، ہم بڑے دل کے لوگ ہیں، دوبارہ آ کر بھی ان کو معاف کریں گے۔

سابق وفاقی وزیرِ داخلہ نے کہا کہ 18 قتل میں ملوث، منشیات فروش کا آج بھی کیس تھا، منشیات فروش کہتا ہے کہ معاف کردو، وزیرِ داخلہ بن گیا ہوں۔

انسدادِ منشیات کی عدالت نے منشیات اسمگلنگ کیس کی سماعت کے دوران وفاقی وزیرِ داخلہ رانا ثناء اللّٰہ کی درخواست پر سرکاری وکیل کو نوٹس جاری کر دیا۔

شیخ رشید نے یہ بھی کہا کہ ملک تشویش ناک حالات میں جانے لگا ہے، 31 مئی تک اہم ہے، ملک کو بچانے کے لیے ہمیں الیکشن کی تاریخ چاہیے۔

واضح رہے کہ شیخ رشید نے اپنی ضمانت قبل از گرفتاری کی درخواست عدالت میں دائر کی تھی۔

عدالت نے شیخ رشید کی 18 مئی تک ضمانت قبل از گرفتاری کی درخواست منظور کی تھی۔

بشکریہ جنگ