نریندر مودی کی ڈنمارک میں شاہی عشائیے میں شرکت

بھارتی وزیر اعظم نریندر مودی نے ڈنمارک کی ملکہ مارگریتھ دوئم کی جانب سے دئیے گئے عشائیے میں شرکت کی۔

بھارتی میڈیا کی رپورٹ کے مطابق، وزیر اعظم نریندر مودی نے گزشتہ روز کوپن ہیگن کے امالینبرگ محل میں ڈنمارک کی ملکہ مارگریتھ دوم کی طرف سے دئیے گئے عشائیے میں شرکت کی۔

اس سرکاری عشائیہ سے ایک روز  قبل نریندر مودی کوپن ہیگن پہنچے اور وہاں اپنے ہم منصب میٹے فریڈریکسن کے ساتھ دو طرفہ ملاقات کی، جہاں دونوں رہنماؤں نے اپنے ممالک کے درمیان تجارت اور ماحولیاتی کارروائی پر تعاون سمیت دو طرفہ امور پر تبادلہ خیال کیا۔

رپورٹ میں یہ بھی بتایا گیا ہے کہ کوپن ہیگن میں دونوں ممالک کےوفود نے بھی اپنے ممالک کے درمیان  گرین اسٹریٹجک پارٹنرشپ میں پیش رفت کا جائزہ لینے کے لیے بات چیت کی۔

رپورٹ کے مطابق، بھارتی وزیر اعظم مودی اور ان کے ہم منصب نے روس یوکرین تنازع پر بھی تبادلہ خیال کیااور مودی نے جاری تنازعے پر بھارت کے سفارتی حل کے موقف کو دہرایا۔

دونوں رہنماؤں نے ایک مشترکہ پریس کانفرنس کی اور متعدد معاہدوں پر دستخط کیے۔

رپورٹ کے مطابق، دونوں ممالک کے درمیان کل نو معاہدوں کا تبادلہ ہواہے۔

جبکہ اپنے اس دورے کے دوران مودی نے کوپن ہیگن میں موجود  بھارتی باشندوں سے بھی خطاب کیا۔

بھارتی وزارت خارجہ کے مطابق، اس تقریب میں طلباء، محققین، پیشہ ور افراد اور کاروباری افراد پر مشتمل ڈنمارک میں رہنے والی بھارتی کمیونٹی کے تقریباََ 1 ہزار سے زیادہ افراد نے شرکت کی۔

اس تقریب میں مودی نے ڈنمارک کے وزیر اعظم فریڈرکسن کی گرمجوشی اور ہندوستانیوں  کے لیے احترام کی تعریف کی اور اس بات پر زور دیا کہ دونوں ممالک ترقی کے لیے مل کر کام کر سکتے ہیں۔

جبکہ مودی نے ڈنمارک میں بھارتی کمیونٹی کے مثبت کردار کی بھی تعریف کی۔

بشکریہ جنگ