شہباز شریف کا دورہ سعودی عرب دوستی کا نیا باب کھولے گا، مریم اورنگزیب

وفاقی وزیر اطلاعات مریم اورنگزیب کا کہنا ہے کہ وزیر اعظم شہباز شریف کا دورہ مثالی پاکستان اور سعودی عرب دوستی کا ایک نیا تاریخی باب کھولے گا۔

سماجی رابطے کی سائٹ ٹوئٹر پر اپنے بیان میں مریم اورنگزیب نے کہا کہ وزیر اعظم شہباز شریف آج حجاز مقدس روانہ ہورہے ہیں، انہیں دورے کی دعوت سعودی ولی عہد شہزادہ محمد بن سلمان نے دی تھی۔

انہوں نے مزید کہا کہ وزارت عظمیٰ کا منصب سنبھالنے کے بعد شہبازشریف کا پہلا غیرملکی دورہ ہے، یہ دورہ دونوں ممالک کے درمیان تعلقات کی تجدید کا مظہر ہے۔

ان کا یہ بھی کہنا تھا کہ چار سال کے دور گھبراہٹ کے بعد پاکستان کے دوستوں کی محفل پھر آباد ہورہی ہے، استحکام، ترقی اورخوش حالی کی منزل کا پھر سے آغاز مبارک ہو۔

رپورٹس کے مطابق وزیراعظم کے ہمراہ کابینہ کے اہم ارکان سمیت اعلیٰ سطح کا وفد بھی ہوگا۔

مریم اورنگزیب نے کہا کہ عمرے کی سعادت اور روضہ رسول پاک پر درود پڑھنے کی برکتیں ہمارے ساتھ ہوں گی۔

مریم اورنگزیب کا اپنے ٹوئٹ میں یہ بھی کہنا تھا کہ’سعودی عرب پاکستان دوستی ہمیشہ زندہ باد‘

بشکریہ جنگ