منحرف PTI ارکان پنجاب اسمبلی کیخلاف ریفرنس الیکشن کمیشن کو ارسال

اسپیکر پرویز الہٰی نے پی ٹی آئی کے منحرف ارکان کیخلاف ریفرنس الیکشن کمیشن کو بھجوا دیا۔

حمزہ شہباز کو وزارت اعلیٰ کا ووٹ دینے پر تحریک انصاف نے ایکشن لے لیا ہے۔

اسپیکر پرویز الہٰی کی جانب سے الیکشن کمیشن کو 26 منحرف ارکان کے خلاف ریفرنس بھجوائے گئے ہیں۔

منحرف ارکان کے خلاف ریفرنس آرٹیکل 63 اے کے تحت الیکشن کمیشن کو جمع کرائے گئے ہیں۔

ریفرنس میں کہا گیا ہے کہ منحرف ارکان نے حمزہ شہباز کو ووٹ دے کر 63 اے کی خلاف ورزی کی ہے، منحرف ارکان کےخلاف آرٹیکل 63 اے کے تحت کارروائی عمل میں لائی جائے۔

اسپیکر کے بھجوائے گئے ریفرنس میں راجہ صغیر، ملک غلام رسول سنگھا، سعید اکبر نوانی، محمد اجمل، فیصل حیات جبوانہ، مہر محمد اسلم، خالد محمود، عبدالعلیم خان، نذیر چوہان، محمد امین ذوالقرنین، نعمان لنگڑیال، نعیم سلمان، زوار حسین وڑائچ، نذیر احمد خان، فدا حسین، زہرہ بتول، محمد طاہر، عائشہ چوہدری، ساجدہ یوسف، ہارون گل، عظمی کاردار، ملک اسد کھوکھر، اعجاز مسیح گل، سبطین رضا، جاوید اختر اور محسن عطا کھوسہ کے نام شامل ہیں۔

پی ٹی آئی  کا کہنا ہے کہ ارکان کو لیٹر جاری کرکے پابند کیا تھا کہ وہ وزیراعلیٰ کے الیکشن میں پرویز الہٰی کو ووٹ دیں۔

ریفرنس میں کہا گیا ہے کہ ان 26 ارکان نے پارٹی پالیسی کے خلاف حمزہ شہباز کو وزارت اعلیٰ کا ووٹ دیا۔

بشکریہ جنگ