کرنٹ سے بچے کی ہلاکت پر کے الیکٹرک کا عدالت میں جواب جمع

کے الیکٹرک کی مبینہ غفلت اور کرنٹ لگنے سے 6 سالہ بچے کی ہلاکت کے کیس میں کے الیکٹرک کے وکیل نے سیشن عدالت جنوبی میں تحریری جواب جمع کروا دیا۔

کراچی جنوبی کی سیشن عدالت میں کے الیکٹرک کی مبینہ غفلت، کرنٹ لگنے سے 6 سال کے بچے کی ہلاکت کے معاملے پر کے الیکٹرک کے خلاف 1 کروڑ 44 لاکھ روپے ہرجانے کے دعوے کی سماعت ہوئی۔

کے الیکٹرک کے وکیل نے تحریری جواب جمع کروادیا جس میں کہا گیا ہے کہ بچے کی ہلاکت سے کے الیکٹرک کا کوئی تعلق نہیں۔

جمع کرائے گئے جواب میں کے الیکٹرک کے وکیل نے کہا ہے کہ گھر کی بالکونی سے کے الیکٹرک کے تار بہت دور ہیں کے الیکٹرک کے تار کو ہاتھ نہیں لگایا جاسکتا تھا، کسی چیز یا راڈ وغیرہ سے کے الیکٹرک کے تار کو چھیڑا گیا ہو گا، کے الیکٹرک کبھی بھی اپنا کام غفلت سے نہیں کرتا۔

درخواست گزار کا مؤقف تھا کہ کے الیکٹرک کے خطرناک تار گھر کی بالکونی سے گزر رہے ہیں۔

17 جنوری 2021 کو بچے اپنے گھر کی بالکونی میں کھیل رہا تھے کہ بچوں کو کرنٹ لگ گیا جس سے ایک 6 سالہ بچہ کریم اللّٰہ جاں بحق ہو گیا تھا۔

بشکریہ جنگ