معاشی ماہرین کا ہنگامی اجلاس طلب

گزشتہ روز منتخب ہونے اور اپنے عہدے کا حلف اٹھانے والے وزیرِ اعظم شہباز شریف نے معاشی ماہرین کا ہنگامی اجلاس طلب کر لیا۔

نو منتخب وزیرِ اعظم شہباز شریف کی زیرِ صدارت اجلاس میں نامور معاشی ماہرین شرکت کر رہے ہیں۔

اجلاس میں ملک کو درپیش موجودہ سنگین معاشی صورتِ حال پر تفصیلی غور ہو گا۔

وزارتِ عظمیٰ کے پہلے روز ہی میاں شہباز شریف ٹھیک صبح 8 بجے وزیرِ اعظم ہاؤس پہنچ گئے۔

اجلاس میں معاشی ماہرین کی آراء کی روشنی میں معاشی اور مالیاتی اقدامات کے بارے میں اہم فیصلوں کا امکان ہے۔

وزیرِ اعظم شہباز شریف ملک کی موجودہ معاشی صورتِ حال، خساروں اور قومی بیلنس شیٹ کے حقائق سے آگاہی حاصل کریں گے۔

واضح رہے کہ میاں محمد شہباز شریف نے گزشتہ شب پاکستان کے 23 ویں وزیرِ اعظم کی حیثیت سے حلف اٹھا لیا۔

نو منتخب وزیرِ اعظم شہباز شریف کی حلف برداری کی تقریب ایوانِ صدر میں منعقد ہوئی۔

صدرِ مملکت ڈاکٹر عارف علوی کے علیل ہو جانے کے باعث تعطیل پر چلے جانے کی وجہ سے قائم مقام صدر و چیئرمین سینیٹ محمد صادق سنجرانی نے شہباز شریف سے وزارتِ عظمیٰ کا حلف لیا۔

حلف برداری کی تقریب میں اعلیٰ سول و فوجی حکام، سیاسی رہنماؤں، اراکینِ پارلیمنٹ اور اہم شخصیات نے شرکت کی۔

آج صبح سویرے وزیرِ اعظم شہباز شریف کی آمد کے موقع پر پر پی ایم ہاؤس کے عملے کی دوڑیں لگ گئیں۔

بلاول بھٹو زرداری، مریم نواز، حمزہ شہباز، مولانا فضل الرحمٰن سمیت متحدہ حکومت کے رہنماؤں، ممبرانِ قومی اسمبلی اور سینیٹ نے تقریب میں شرکت کی۔

مختلف ممالک کے سفیر بھی تقریبِ حلف برداری میں موجود تھے۔

اس سے قبل قومی اسمبلی نے شہباز شریف کا 174 ووٹوں سے ملک کے نئے وزیرِ اعظم کی حیثیت سے انتخاب کیا تھا۔

بشکریہ جنگ