وزیر اعلیٰ پنجاب کا انتخاب، ق لیگ کا بھی ہائیکورٹ سے رجوع

وزیر اعلیٰ پنجاب کے انتخاب کے معاملے پر ق لیگ نے بھی حمزہ شہباز کی درخواست میں فریق بننے کیلئے لاہور ہائیکورٹ سے رجوع کرلیا ہے۔

مسلم لیگ ق کے جنرل سیکریٹری کامل علی آغا نے عدالت میں متفرق درخواست دائر کردی ہے۔

درخواست میں مؤقف اپنایا گیا ہے کہ اراکین اسمبلی کو مختلف ہوٹلز میں محبوس رکھا گیا ہے، انہیں ہوٹلز سے باہر نکالنے کا حکم دیا جائے۔

متفرق درخواست کے متن کے مطابق وزیر اعلیٰ پنجاب کےانتخاب میں پرویز الہٰی بھی امیدوار ہیں، لاہور ہائیکورٹ میں حمزہ شہباز اور دوست محمد مزاری کی درخواست زیر سماعت ہے۔

عدالت نے کہا کہ ڈپٹی اسپیکر نے اختیارات واپس لینے کے خلاف علیحدہ سے درخواست دائر کی۔

درخواست میں استدعا کی گئی کہ اس کیس میں ہمیں بھی فریق بننے کی اجازت دی جائے۔

خیال رہے کہ مسلم لیگ ن نے وزیر اعلیٰ پنجاب کے انتخابات کرانے کے لیے لاہور ہائیکورٹ سے رجوع کر لیا ہے، حمزہ شہباز کی دائر کردہ درخواست پر ہائی کورٹ آفس نے اعتراض عائد کیا جسے چیف جسٹس نے سماعت کے بعد ختم کر دیا۔

بشکریہ جنگ