عمران خان کیساتھ تھا، ہوں اور رہونگا: جلیل شرقپوری
مسلم لیگ ن کے منحرف ایم پی اے میاں جلیل احمد شرقپوری کا کہنا ہے کہ عمران خان کے ساتھ تھا، ہوں اور رہوں گا۔
شیخو پورہ سے جاری کیے گئے بیان میں مسلم لیگ ن کے منحرف ایم پی اے میاں جلیل احمد شرقپوری نے یہ بات کہی ہے۔
ان کا مزید کہنا ہے کہ وزیرِ اعظم عمران خان کو بیرونی سازش کے تحت ہٹایا جا رہا ہے۔
منحرف ن لیگی ایم پی اے میاں جلیل احمد شرقپوری کا یہ بھی کہنا ہے کہ نیا الیکشن ہی بہتر راستہ تھا۔
واضح رہے کہ گزشتہ روز سپریم کورٹ نے قومی اسمبلی کو بحال کر دیا، تمام وزیر اپنے عہدوں پر بحال ہو گئے۔
چیف جسٹس پاکستان عمر عطاء بندیال نے پانچ صفر سے متفقہ فیصلہ سنا دیا۔
سپریم کورٹ نے ڈپٹی اسپیکر کی 3 اپریل کی رولنگ آئین کے خلاف قرار دے کر کالعدم کر دی، وزیرِ اعظم عمران خان کی اسمبلی تحلیل کرنے کی ایڈوائس بھی مسترد کر دی۔
سپریم کورٹ نے اپنے فیصلے میں کہا ہے کہ وزیرِ اعظم آئین کے پابند تھے، وہ صدر کو اسمبلی توڑنے کی ایڈوائس نہیں کر سکتے تھے، قومی اسمبلی بحال ہے، تمام وزیر اپنے عہدوں پر بحال ہیں، اسپیکر کا فرض ہے کہ اجلاس بلائے۔
عدالتِ عظمیٰ نے اسپیکر کو قومی اسمبلی کا اجلاس فوری بلانے کا حکم دیتے ہوئے کہا کہ 9 اپریل کو صبح 10 بجے سے پہلے پہلے تحریکِ عدم اعتماد پر ووٹنگ کرائی جائے۔
سپریم کورٹ نے حکم دیا کہ تحریکِ عدم اعتماد پر ووٹنگ کے دوران کسی رکنِ قومی اسمبلی کو ووٹ کاسٹ کرنے سے روکا نہیں جائے، تحریکِ عدم اعتماد کا عمل مکمل ہونے تک اجلاس مؤخر نہیں کیا جا سکتا۔
Comments are closed.