بابر الیون ورلڈکپ کا بدلہ لینے میں ناکام، واحد T20 آسٹریلیا نے جیت لیا

پاکستان ٹیم ٹی ٹوئنٹی ورلڈکپ 2021 کے سیمی فائنل کی شکست کا بدلہ لینے میں ناکام ہوگئی، سیریز کا واحد ٹی ٹوئنٹی میچ آسٹریلیا نے 3 وکٹوں سے جیت لیا۔ 

قذافی اسٹیڈیم لاہور میں کھیلے جارہے اس میچ میں آسٹریلیا نے ٹاس جیت کر پہلے بولنگ کرنے کا فیصلہ کیا تھا۔ 

قومی بیٹرز ایک مرتبہ پھر اوسط درجے کی بیٹنگ کرتے ہوئے 20 اوورز میں صرف 162 رنز ہی بناسکی تھی۔ 

پہلے بیٹنگ کرتے ہوئے پاکستانی کپتان بابر اعظم اور محمد رضوان نے شاندار اوپننگ پارٹنر شپ لگائی، تاہم قومی بیٹرز کی جانب سے اس کے بعد کوئی بڑی پارٹنرشپ دیکھنے میں نہیں آئی۔ 

بابر اعظم نے ایک مرتبہ پھر اپنی کلاس دکھاتے ہوئے 66 رنز کی عمدہ اننگز کھیلی، جبکہ محمد رضوان 23 رنز کی اننگز کھیل سکے۔ 

خوشدل شاہ نے 24 اور اختتامی لمحات میں عثمان قادر کے 18 رنز نے ٹیم کو قابلِ اعتبار ٹوٹل تک پہنچایا۔ 

گرین شرٹس نے مقررہ 20 اوورز میں 8 وکٹوں کے نقصان پر 162 رنز بنائے۔

پاکستانی بیٹنگ لائن کو بریک لگانے میں سب سے بڑا کردار آسٹریلوی بولر نیتھن ایلس کا تھا، انہوں نے 4 وکٹیں لیں۔ 

کیمرون گرین نے دو جبکہ ایڈم زیمپا اور شان ایبٹ نے ایک ایک کھلاڑی کو آؤٹ کیا۔  

ہدف کے تعاقب میں آسٹریلوی بلے بازوں نے دھواں دار آغاز کیا، تاہم 40 کے مجموعے پر ٹریوس ہیڈ آؤٹ ہوئے۔ 

کپتان ایرون فنچ نے ذمہ دارانہ اننگز جاری رکھی لیکن ان کا ساتھ جوش انگلس نے 24 اور مارکس اسٹوئنس نے 24 رنز کی برق رفتار اننگز کے ساتھ دیا۔ 

میچ کے اختتامی لمحات میں اس وقت دلچسپ صورتحال پیدا ہوئی جب 55 رنز بنانے والے ایرون فنچ اور پھر اس کے بعد شان ایبٹ کو صفر پر شاہین آفریدی نے آؤٹ کیا۔ 

آسٹریلیا کو جب آخری اوور میں جیت کے لیے 4 رنز درکار تھے تو ایسے میں حارث رؤف کی جانب سے کروائے گئے آخری اوور کی پہلی ہی گیند پر چوکا لگا کر بین میک ڈرمنٹ نے اپنی ٹیم کو فتح سے ہمکنار کیا۔

قومی ٹیم اپنی پوری اسٹرینتھ کے ساتھ میدان میں اتر رہی ہے، تاہم ٹیم کو شاداب خان کی خدمات حاصل نہیں ہیں۔ 

ٹاس کے موقع پر بابر اعظم کا کہنا تھا کہ میچ میں 4 فاسٹ بولر، ایک اسپنر اور 6 بیٹرز کے ساتھ کھیل رہے ہیں۔

دوسری جانب مہمان ٹیم کے مارنس لبوشین، کیمرون گرین اور بین ڈوارشوائس کیریئر کا پہلا بین الاقوامی ٹی ٹوئنٹی میچ رہے ہیں۔

پلیئنگ الیون:

بابر اعظم کی کپتانی میں میدان میں اترنے والی پاکستانی ٹیم میں محمد رضوان، فخر زمان، افتخار احمد، آصف علی، خوشدل شاہ، حسن علی، محمد وسیم، شاہین شاہ آفریدی، حارث رؤف اور عثمان قادر شامل تھے۔

اسی طرح آسٹریلوی ٹیم کپتان ایرون فنچ، ٹریوس ہیڈ، جوش انگلس، مارنس لبوشین، مارکس اسٹوئنس، کیمرون گرین، بین میک ڈرمٹ، شان ایبٹ، بین ڈوارشوائس، نیتھن ایلس اور ایڈم زیمپا پر مشتمل تھے۔

بشکریہ جنگ