کشکول پرانا فقیر نئے آئے ہیں، سراج الحق

لاہور:امیرجماعت اسلامی پاکستان سراج الحق نے کہا ہے کہ کشکول پرانا فقیر نئے آئے ہیں، موجودہ اور سابقہ حکومت کی پالیسیوں، ترجیحات اور ایکشن میں رتی برابر فرق نہیں، آئی ایم ایف سے اب تک 23پروگرام لیے گئے، حکمران عوام سے جھوٹ بول کر اور بہتری کے دعوے کر کے قرضے لیتے ہیں۔

سراج الحق نے کہا کہ  آئی ایم ایف کے بابو ہمارے ملک کے فیصلے واشنگٹن کے بندکمروں میں بیٹھ کر کرتے ہیں، حکومت بتائے کہ یہ پارلیمنٹ میں طے ہوا تھا یا کابینہ کا فیصلہ تھا کہ یکدم پیٹرول کی قیمت میں 30روپے فی لیٹر اضافہ کردیا جائے، آئی ایم ایف نے حکم دیا اور ہمارے حکمرانوں نے تابعداری دکھائی۔

امیر جماعت اسلامی پاکستان کا کہنا تھا کہ  معیشت میں بہتری لانی ہے، تو حکمران سودی نظام، غیرترقیاتی اخراجات اور وی آئی پی کلچر کو ختم کریں۔ اگر بجٹ میں سود اور مہنگائی کے خاتمے کا پروگرام نہ دیا گیا تو جماعت اسلامی اگلے روز ہی عوام کو سڑکوں پر لائے گی۔

انہوں نے کہاکہ  اس وقت جماعت اسلامی کے علاوہ سبھی جماعتیں کہیں نہ کہیں اقتدار میں ہیں، ہم ان حکمران جماعتوں کو چیلنج کرتے ہیں کہ بہتری کا کوئی ایجنڈا لے کر آئیں۔ ملک اس وقت تک ترقی نہیں کرے گا جب تک یہاں اسلامی نظام نافذ نہیں ہو گا۔

سراج الحق نے مزید کہاکہ  عوام کی اکثریت اسلامی نظام چاہتی ہے، مگر استعمار کے ا یجنٹ جاگیردار اور وڈیرے اس کی راہ میں رکاوٹ ہیں، دھونس، دھاندلی اور دولت کے بل بوتے پر الیکشن جیتے جاتے ہیں۔

امیر جماعت اسلامی پاکستان کا کہنا تھا کہ  جس دن شفاف الیکشن ہوئے جماعت اسلامی حیران کن نتائج دکھائے گی۔