کراچی بلدیاتی الیکشن کیلئے کیوں نہ پنجاب سے سیکیورٹی اہلکار تعینات کردیں،چیف الیکشن کمشنر 

اسلام آباد:الیکشن کمیشن نے سندھ بلدیاتی انتخابات کیس کا فیصلہ محفوظ کرلیا،وفاقی حکومت نے کراچی میں بلدیاتی انتخابات کیلئے رینجرز فراہم کرنے سے انکار کردیا،چیف الیکشن کمشنر نے کہا ہے کہ کراچی بلدیاتی الیکشن کیلئے کیوں نہ پنجاب سے سیکیورٹی اہلکار تعینات کردیں۔

سندھ میں بلدیاتی انتخابات کروانے کے حوالے سے چیف الیکشن کمشنرسکندر سلطان راجہ کے سربراہی میں پانچ رکنی بنچ نے سماعت کی۔اس موقع پر جماعت اسلامی کے حافظ نعیم الرحمان، ایم کیو ایم کے وسیم اختر، ایڈمنسٹریٹر کراچی اور رہنما پیپلزپارٹی مرتضیٰ وہاب اور آئی جی سندھ بھی الیکشن کمیشن میں موجود تھے۔وفاقی حکومت نے کراچی میں بلدیاتی انتخابات کیلئے رینجرز فراہم کرنے سے انکار کردیا۔

 جوائنٹ سیکرٹری وزارت داخلہ محمد رمضان ملک نے کہا کہ الیکشن کی سکیورٹی فراہم نہیں کر سکتے، سیلاب اور امن و امان کی صورتحال کے باعث سکیورٹی فراہم نہیں کی جاسکتی، اس وقت بلدیاتی انتخابات کیلئے سول آرمڈ فورسز فراہم نہیں کرسکتے۔

سندھ حکومت نے بھی سکیورٹی کی عدم دستیابی کا جواز بناکر بلدیاتی الیکشن کرانے سے معذرت کرلی۔ ایڈمنسٹریٹر مرتضیٰ وہاب نے کہا کہ کراچی بلدیاتی انتخاب نوے دن کے لیے ملتوی کئے جائیں۔

ممبر کمیشن نثار درانی نے کہا کہ بلدیاتی انتخابات مزید ملتوی ہونا آئین کی خلاف ورزی نہیں؟۔سپیشل سیکرٹری الیکشن کمیشن ظفر اقبال نے کہا کہ وزارت داخلہ نے 18 اکتوبر کو آرمڈ فورس اہلکاروں کی تعیناتی سے معذرت کی،حکومت سندھ نے 90 روز کیلئے بلدیاتی انتخابات ملتوی کرنے کی منظوری دی ہے، الیکشن کمیشن کراچی میں الیکشن کرانے کیلئے تیار ہے۔

چیف الیکشن کمشنر نے کہا ہے کہ صوبائی حکومت بلدیاتی انتخابات ملتوی کرنے کیلئے قانون سازی نہیں کرسکتی، بلدیاتی انتخابات کی تاریخ کا اعلان کرنا الیکشن کمیشن کا اختیار ہے، سندھ پولیس کے اہلکار سکیورٹی کیلئے اسلام آباد تعینات ہیں کیوں نہ پنجاب سے سکیورٹی اہلکار سندھ تعینات کردیں، رینجرز یا دیگر قانون نافذ کرنے والے اداروں کو سکیورٹی کیلئے تعینات کیا جاسکتا ہے، ہم پنجاب حکومت سے سکیورٹی مانگ سکتے ہیں۔

آئی جی سندھ اور چیف سیکرٹری سندھ نے بھی بلدیاتی انتخابات ملتوی کرنے کی سفارش کردی۔وسیم اختر نے کہا کہ مردم شماری میں کراچی کی آدھی آبادی کم کردی گئی، کراچی میں حلقہ بندیوں میں بڑے پیمانے پر خامیاں ہیں۔

چیف الیکشن کمشنر سکندرسلطان راجہ نے ان سے کہا کہ مردم شماری پر اعتراضات سی سی آئی میں لیکر جائیں، مردم شماری پر اعتراضات کیلئے الیکشن کمیشن متعلقہ فورم نہیں ، ایم کیو ایم نے درست وقت پر اپنے خدشات مناسب فورم پر نہیں رکھے۔

امیر جماعت اسلامی کراچی حافظ نعیم الرحمان نے موقف اختیار کیا کہ آرمی، ایف سی یا دیگر صوبوں کی پولیس بلا کر کراچی کے بلدیاتی انتخابات کرائے جائیں، پیپلز پارٹی اور ایم کیو ایم کی اتحادی حکومت نے جعلی مردم شماری کی خود منظوری دی تھی، آج مردم شماری کی آڑ میں بلدیاتی انتخابات ملتوی کرنے کا کہا جارہا ہے۔

انہوں نے کراچی میں بلدیاتی انتخابات کیلئے 45 روز کا وقت دینے کی تجویز دیتے ہوئے کہا کہ کراچی کے برے حالات ہیں، بلدیاتی انتخابات مزید ملتوی نہ کئے جائیں، کراچی کا بے اختیار میئر ہوا تو بھی آواز تو اٹھائے گا، کراچی میں 40 ہزار پولیس اہلکار ہیں جبکہ ضرورت 17 ہزار اہلکاروں کی ہے۔

حافظ نعیم الرحمن نے کہا کہ پاک آرمی کے جوان تعینات کر کے انتخابات کرائے جائیں، سندھ حکومت تو کبھی کراچی میں بلدیاتی انتخابات نہیں کرانا چاہتی ہی نہیں، ڈرتے رہے تو پھر ملک میں کبھی کہیں الیکشن نہیں ہوں گے، جن کے اشارے سے کراچی بند ہوتا تھا وہ آج کہہ رہے کہ کراچی کو حقوق نہیں ملے، وفاقی حکومت میں ایم کیو ایم شامل ہے لیکن اختیارات کا رونا رو رہی ہے۔

چیف الیکشن کمشنر نے کہا کہ الیکشن کمیشن نے وزارت داخلہ کے ذریعے براہ راست رابطے کیے، مگر وزارت داخلہ پاک آرمی اور رینجرز اہلکار اسٹیٹک ڈیوٹی تعیناتی کیلئے تیار نہیں، ہم آرٹیکل 220 کے تحت براہ راست حکم جاری کرسکتے ہیں، الیکشن کمیشن کراچی میں فوری بلدیاتی انتخابات کرانا چاہتا ہے۔

الیکشن کمیشن نے سندھ بلدیاتی انتخابات کیس کا فیصلہ محفوظ کرلیا۔ چیف الیکشن کمشنر نے کہا کہ بلدیاتی انتخاب سے متعلق مناسب فیصلہ دیں گے۔