ویسٹ انڈیز کے مزید کھلاڑیوں میں کورونا کی تصدیق، سیریز منسوخ ہونے کا خدشہ

کراچی (سید وزیر علی قادری) پاکستان میں موجود ویسٹ انڈیز کی کرکٹ ٹیم کے مزید 5 افراد میں کورونا وائرس کی تصدیق ہوگئی جس کے بعد سیریز منسوخ ہونے کا خدشہ پیدا ہوگیا ہے۔

ویسٹ انڈیز بورڈ کے مطابق 3 کھلاڑی اور 2 آفیشلز قرنطینہ میں چلے گئے، شائی ہوپ، اسپنراکیل ہوسین، آل راؤنڈر جسٹن گریوز کورونا کا شکار ہوگئے۔ اسسٹنٹ کوچ روڈی ایسٹ، ٹیم فزیشن اکشائی بھی کورونا سے متاثر ہوئے، ٹیم پاکستان کا دورہ جاری رکھے گی۔

ذرائع کے مطابق دونوں بورڈز کے اعلیٰ حکام ملاقات کے بعد اصولی اتفاق کرتے ہوئے بقیہ میچز کے نہ ہونے کا اعلان کریں گے۔

خیال رہے کہ کووڈ 19 ٹیسٹنگ میں مزید 5 اسکواڈز میں شامل کھلاڑیوں اور آفیشلز کی رپورٹ مثبت آنے کے علاوہ پہلے ہی 3 کھلاڑی قرنطینہ میں ہیں جبکہ ایک انجرڈ ہے۔ 3 ٹی ٹوئنٹی میچز کی سیریز کا تیسرا اور آخری میچ نیشنل اسٹیڈیم کراچی میں شیڈول ہے جبکہ ون ڈے سیریز 18 کو پہلا میچ کھیلا جانا تھا۔