ن لیگ، پی پی، پی ٹی آئی اور جرنیلوں نے آئین کیساتھ بے وفائی کی، سراج الحق

بہاولپور: امیر جماعت اسلامی سراج الحق نے کہا ہے کہ دوخاندانوں نے سات دفعہ حکومتیں کیں، خودخوشحال ، ملک کو بدحال کر دیا۔ لیگ، پیپلزپارٹی، پی ٹی آئی اور جرنیلوں نے آئین کے ساتھ بے وفائی کی، انہی حکمرانوں کی غلط پالیسیوں کے نتیجہ میں پاکستان آئی ایم ایف، ورلڈ بنک کا غلام ہے۔

سراج الحق کا کہنا تھا کہ جماعت اسلامی کی حکومت کسی خاندان کی نہیں، حقیقت میں عوام کی نمائندہ ہو گی۔ بار بار آزمائے ہوئے چہرے ملک کے مسائل حل کرنے کی بجائے، اضافے کا باعث بنے۔ نوجوان 8فروری کو دوخاندانوں کے محلات کا طواف کرنے کی بجائے ان کا احتساب کرنے کو تیار ہیں۔ دو خاندانوں کی حکومتوں کی وجہ سے 25کروڑ عوام بنیادی حقوق، بچے بچیاں تعلیم، نوجوان روزگار سے محروم ہیں، انہوں نے قومی ادارے تباہ کردیے۔ ن لیگ، پیپلزپارٹی، پی ٹی آئی اور جرنیلوں نے آئین کے ساتھ بے وفائی کی، انہی حکمرانوں کی غلط پالیسیوں کے نتیجہ میں پاکستان آئی ایم ایف، ورلڈ بنک کا غلام ہے۔

ان کا کہنا تھا کہ قوم کرپشن، جہالت، بے روزگاری سے پاک اسلامی و خوشحال پاکستان دیکھنے کے لیے 8فروری کو ترازو پر ٹھپہ لگا کر جماعت اسلامی کو کامیاب کرائیں۔ ہم ان شاء اللہ ملک کو خوب صورت، پرامن، روشن مستقبل دیں گے۔ اقتدار ملا تو ملک میں قرآن کی حکومت نافذ کریں گے، ڈاکٹر عافیہ صدیقی کو امریکی جیل سے رہا کرائیں گے، خواتین کے حقوق کی حفاظت کریں گے، ان کو وراثت میں حق دلائیں گے، خواتین کے لیے علیحدہ ٹرانسپورٹ، صنعتی یونٹ اور یونیورسٹیاں قائم کی جائیں گی۔ ان خیالات کا اظہار انہوں نے بہاولپور میں خواتین کنونشن سے خطاب کرے ہوئے کیا۔ اس موقع پر امیر جماعت اسلامی پنجاب جنوبی راؤ محمد ظفر، امیر ضلع سید ذیشان اختر، سیکرٹری جنرل جماعت اسلامی پاکستان حلقہ خواتین ڈاکٹر حمیرا طارق، ڈاکٹر سمحیہ راحیل قاضی، تسنیم سرور، عظمیٰ نعیم، ڈاکٹر ثمینہ سعید بھی موجود تھیں۔

سراج الحق کا کہنا تھاکہ نام نہاد تینوں بڑی پارٹیوں نے ایک بار نہیں بار بار حکومتیں کیں،لیکن انہوں نے ایک دن کے لیے بھی پاکستان میں دین کو نافذ نہیں کیا۔ آج ملک قرضوں میں جکڑا ہوا ہے، میں پوچھتا ہوں یہ قرض کس نے لیے اور کس نے ہڑپ کیے؟ آج اگر اس پاکستان میں ہر پانچواں پاکستانی گندا پانی پینے پر مجبور ہے تو کون ذمہ دار ہے، 31 فیصد نوجوان تعلیم کے باوجود بے روزگار ہیں، 11 کروڑ پاکستانی خطہ غربت سے نیچے زندگی گزاررہے ہیں،تو اس کی ذمہ داری کس پر عائد ہوتی ہے۔ ملک میں بدامنی،مہنگائی،بے روزگاری ہے تو ان تمام مسائل کی جڑ تینوں حکمران پارٹیوں کی سیاست ہے۔ یہ کہاں کا انصاف ہے دو خاندان ہی ملک پر مسلط رہیں۔