نامعلوم نمبر سے دھمکیاں دی جارہی ہیں، عمران خان

خوشاب: تحریک انصاف کے چیئرمین عمران خان نے کہا ہے کہ ایک نامعلوم نمبر سے دھمکیاں دی جارہی ہیں اور خوفزدہ کرنے کی کوشش کی جارہی ہے۔

میڈیا رپورٹ کے مطابق پاکستان تحریک انصاف کے سربراہ اور سابق وزیراعظم عمران خان نے پنجاب کے ضمنی الیکشن کے سلسلے میں خوشاب میں انتخابی جلسے سے خطاب کرتے ہوئے کہا ہے کہ ایک ٹیلیفون کل جس کا نمبر نہیں آتا وہاں سے دھمکیاں دی جارہی ہیں اور خوفزدہ کرنے کی کوشش کی جارہی ہے

عمران خان کا کہنا تھا کہ لاہور میں بیٹھے ایک آدمی کا مشن ہے کہ کسی نہ کسی طرح چوروں کو الیکشن جتوا دیں۔ لاہور میں مسٹر ایکس بیٹھا ہوا ہے میں کہوں گا نہیں خود اندازہ لگالیں، 2013 میں بھی اس نے دھاندلی کرائی تو اس کو اینٹی کرپشن کے ہیڈ سے نوازا گیا، آج چیف الیکشن کمشنر کی بیوی کو بڑا عہدہ دیکر دھاندلی کرائی جائیگی لیکن یہ دھاندلی تو کیا دھاندلا بھی کرلیں، ا ن شااللہ ہم ان کوشکست دینگے، میں لاہور والے کو بھی بتا رہا ہوں تم نے جو مرضی کرنا ہے کرو تم خود کو صرف ذلیل کرو گے، لوگ تمہیں برا بھلا کہیں گے، تم نے جتنی دھاندلی کرانی ہے کرالو لیکن دھاندلی کے باوجود اتوار کو ضمنی الیکشن کے نتائج آئیں گے تو حمزہ ککڑی جو پہلے ہی غیر آئینی وزیراعلیٰ ہے اس کی یہ حیثیت بھی ختم اور واپس جائیگا۔

چیئرمین تحریک انصاف کا کہنا تھا کہ یہ صحافیوں، سیاستدانوں میں خوف طاری کررہے ہیں ،دہشت پھیلا رہے ہیں، لیکن کان کھول کر سن لو ہم وہ لوگ ہیں جو کسی صورت امریکا کی غلامی نہیں کریں گے، یہ الیکشن نہیں بلکہ پاکستان کی حقیقی آزادی کی جنگ ہے، ایک ایک نوجوان نے ذمے داری لینی ہے، شریف برادران اور ان کے بچوں نے کبھی کوئی چیز ایمانداری سے نہیں کی، بزنس میں کرپشن، الیکشن میں دھاندلی ،عدالتوں میں جھوٹ بولتے ہیں۔

عمران خان کا مزید کہنا تھاکہ یہاں بھینس اور گاڑی چور تو جیل میں چلے جاتے ہیں لیکن جن بڑے بڑے ڈاکوؤں نے ملک کا اربوں روپیہ چوری کیا انہیں ہمارے اوپر بٹھا کر 22 کروڑ لوگوں کی توہین کی گئی، جہاں چھوٹے چوروں کو جیل میں ڈالا اور بڑے ڈاکوؤں کو این آر او دیا جائے تو وہ ملک اور قوم تباہ ہوجاتے ہیں، ملک کی کامیابی کیلئے سب سے بڑا اصول اللہ تعالیٰ کا بنایا ہوا نظام انصاف ہے، آج شہبازشریف جیسا کرپٹ، نوازشریف جیسا بھگوڑا اور زرداری جیسی بیماری ملک لوٹ رہے ہیں، فضل الرحمان بات اسلام کی کرتا ہے اور ضمیر ڈیزل کے پرمٹ پر بیچ دیتا ہے، سازش سے جوتے پالش کرنےوالے کو ہمارا سربراہ بنادیا گیا لیکن قوم ان لوگوں کو کبھی تسلیم نہیں کرے گی۔