معروف عالم دین مولانا یوسف اصلاحی قضائے الٰہی سے انتقال کرگئے

نئی دہلی:بھارت کے ممتاز عالم دین،داعی و مفسر قرآن مولانا محمد یوسف اصلاحی طویل علالت کے بعد90سال کی عمر میں انتقال کرگئے،مرحوم کافی عرصے سے بیمار تھے اور طبیعت زیادہ بگڑنے پر انھیں اسپتال منتقل کیا گیا تھا۔

مولانا اصلاحی کی 9 جولائی 1932 کو پیدا ہوئے ۔انھوں نے ابتدائی تعلیم اور حفظ وتجوید کے بعد بریلی اسلامیہ انٹر کالج سے ہائی اسکول پاس کیا، پھر اپنے والد شیخ الحدیث مولانا عبدالقدیم خان کی خواہش کے مطابق مدرسہ مظاہر علوم سہارن پور میں داخل ہوئے، جہاں دو سال تعلیم حاصل کرنے کے بعد مدرس الاصلاح سرائے میر اعظم گڑھ آگئے جہاں مولانا اختر احسن اصلاحی کی زیر تربیت رہے اور امتیازی نمبروں سے سند فضیلت حاصل کی۔

مدرس الاصلاح سے فراغت کے ساتھ ہی جماعت اسلامی ہند کے رکن بن گئے، اس وقت ان کی عمر 25 برس کی رہی ہوگی اور اسی وقت سے دعوت وتبلیغ، تصنیف وتالیف اور تعلیم وتربیت کے میدان سے ہمیشہ کے لیے وابستہ ہوگئے۔

مولانا نے اپنی اسی علمی وابستگی کے باعث 1972 میں اردو زبان میں شہر رام پور، یو پی سے ماہنامہ ذکری کا اجرا کیا جو پچھلے ایک دہائی سے بھی زائد عرصے سے ماہنامہ ذکری جدید کے نام سے انہی کی ادارت میں نئی دہلی سے پابندی کے ساتھ شائع ہوتا رہا ہے۔ مولانا کی نگرانی میں کئی فلاحی اور تعلیمی ادارے بھی چل رہے تھے۔

مرحوم نے امتیازی نمبروں سے  سندِ فضیلت حاصل کی ۔ وہ آداب زندگی نامی کتاب سمیت سیکڑوں کتابوں کے مصنف تھے۔