عمران خان سمیت پی ٹی آئی عہدیداروں کے نام ای سی ایل میں ڈالنے کا فیصلہ

اسلام آباد: الیکشن کمیشن کی جانب سے پی ٹی آئی ممنوعہ فنڈنگ کیس کا فیصلہ آنے کے بعد حکومت کی جانب سے پہلا ممکنہ اقدام سامنے آ گیا، جس کے مطابق حکومت نے چیئرمین تحریک انصاف عمران خان سمیت پی ٹی آئی کے دیگر عہدے داروں کے نام ای سی ایل میں ڈالنے کا فیصلہ کیا ہے۔

نجی ٹی وی کی رپورٹ کے مطابق الیکشن کمیشن آف پاکستان نے 8 سال بعد پی ٹی آئی ممنوعہ فنڈنگ کیس کا فیصلہ سنایا، جس میں قرار دیا گیا ہے کہ تحریک انصاف نے ممنوعہ فنڈز حاصل کیے ہیں، جس کے بعد وفاقی کابینہ نے الیکشن کمیشن کے فیصلے کو پیش نظر رکھتے ہوئے پی ٹی آئی کے عہدے داروں کے خلاف کارروائی کا فیصلہ کیا ہے۔

ذرائع کے مطابق حکومت نے ملک سے باہر جانے سے روکنے کےلیے پی ٹی آئی کے چیئرمین عمران خان، سابق گورنر کے پی کے شاہ فرمان  اور سابق گورنر سندھ عمران اسماعیل کے نام ایگزٹ کنٹرول لسٹ میں شامل کرنے کا فیصلہ کیا ہے۔ علاوہ ازیں حکومت کی جانب سے یوٹیلیٹی اسٹورز کے سابق چیئرمین ذوالقرنین کا نام بھی ای سی ایل میں ڈالنے کا فیصلہ کیا گیا ہے۔