شہباز نے بجلی گھروں کے پیسے اپنی شوبازی پر خرچ کردیے، عمران اسماعیل

کراچی: سابق گورنر سندھ عمران اسماعیل نے کہاہے کہ لوڈ شیڈنگ کی وجہ بجلی گھروں کی ادائیگی نہ ہونے کے باعث ہے، شہباز نے بجلی گھروں کے پیسوں کو اپنی شوبازی اشتہارات پر خرچ کردیے۔

عمران اسماعیل نے ملک میں مہنگائی اور لوڈ شیڈنگ کی صورتحال پر تنقید کرتے ہوئے کہا کہ ملک بھر میں جاری بدترین لوڈشیڈنگ حکومتی غلط پالیسیوں کا نتیجہ ہے، مختلف علاقوں میں 16 گھنٹے تک کی لوڈشیڈنگ ہورہی ہے،شوباز حکومت کا عوام کو بجلی فراہم کرنے کا وعدہ وفا نہ ہوا،اناڑی وزیراعظم نے ملک بھر میں بجلی کا شاٹ فال ساڑے چھ ہزار میگاواٹ تک پہنچادیا۔

سابق گورنر سندھ نے کہا کہ امپورٹڈ وزیراعظم کا لوڈ شیڈنگ پر نوٹس محض لطیفے کے کچھ نہیں، موجودہ حکومت سے وجوہات پوچھیں تو عجیب و غریب منطق پیش کرتے ہیں، غیر اعلانیہ لوڈ شیڈنگ سے شہری، دیہاتی، صنعتیں، چھوٹے بڑے کارخانے شدید متاثر ہورہے ہیں۔

انہوں نے کہا کہ  امپورٹڈ اتحادی حکومت نے بجلی کی قیمتوں پر 5 بار پیسے بڑھائے، امپورٹڈ سرکار نے پہلے 27 پاور پلانٹ بند ہونے کا الزام لگایا، پھر جادو کی چھڑی کا استعمال کرکے 27 پاور پلانٹ فعال کرنے کا دعوی کیا، شہباز سچ بولیں لوڈ شیڈنگ کی وجہ بجلی گھروں کی ادائیگی نہ ہونے کے باعث ہے۔

سابق گورنر سندھ نے کہا کہ اس وقت ملک میں کئی صنعتیں حکومتی نااہلی کے باعث بند ہوچکی ہیں، ماضی میں بھی ن لیگ حکومت کی غلط حکمت عملی سے کئی سرمایہ کار ملک چھوڑ کر گئے، خدارا امپورٹڈ حکومت عوام کا مال کھانے کے بجائے عوام پر ترس کھائیں۔