بجلی کی قیمتوں میں مزید اضافے کا امکان

سی پی پی اے نے بجلی کی قیمتوں میں اضافے کے لیے نیپرا میں درخواست دائر کر دی۔

ذرائع ابلاغ کے مطابق نیپرا یکم فروری کو بجلی کی قیمتوں میں اضافے کی درخواست پر سماعت کرے گا، اضافے کی صورت میں صارفین پر 30 ارب روپے سے زائد کا اضافی بوجھ پڑے گا۔

درخواست کے مطابق دسمبر 2021 میں 8 ارب 52 کروڑ یونٹ بجلی پیدا ہوئی جس کی پیداواری لاگت 73 ارب 84 کروڑروپے رہی، 22 روپے 24 پیسے میں فرنس آئل سے مہنگی ترین بجلی پیدا کی گئی۔

سی پی پی اے نے درخواست دسمبر کی ماہانہ فیول ایڈجسٹمنٹ کی مد میں دی ہے۔

خیال رہے کہ گزشتہ روز نیپرا نے سہہ ماہی ایڈجسٹمنٹ کی مد میں بجلی کے فی یونٹ قیمت میں 99 پیسے کمی کی تھی۔ نیپرا کی جانب سے بجلی کی قیمت میں کمی کا نوٹیفکیشن جاری کیا گیا جس میں بتایا گیا کہ قیمتوں میں کمی سے صارفین کو 22 ارب روپے کا ریلیف ملے گا۔