الخدمت کے تحت آئی ٹی میں نوجوانوں کے لیے ”بنو قابل پروجیکٹ“ کا آغاز

کراچی: الخدمت کراچی کے تحت آئی ٹی کے شعبے میں تعلیم یافتہ نوجوانوں کے لیے ”بنو قابل پروجیکٹ“ کا آغاز کر دیا گیا ہے، پروجیکٹ کے تحت میٹرک اور انٹر پاس کرنے والے طلبہ کوتین اور چھ ماہ کے ویب ڈویلپمنٹ، ویب ڈیزائنگ ایمزون سمیت  مختلف کورسز کرائے جائیں گے۔

”بنو قابل پروجیکٹ“ کی افتتاحی تعارفی تقریب سے الخدمت کراچی کے صدر و امیر جماعت اسلامی کراچی حافظ نعیم الرحمن نے خطاب کرتے ہوئے کہا ہےکہ  یہ کورسز PASHA,APTEC, سمیت دیگر نجی اداروں کے تعاون سے کرائے جائیں گے اور، پلسیمنٹ بیورو قائم کیا جا رہا ہے جس کے ذریعے سے کورسز کرنے والے نوجوانوں کو ملازمتوں کی فراہمی کی بھی کوشش کی جا ئے گی۔

حافظ نعیم الرحمن کا کہنا تھا کہ  پروجیکٹ کے لیے الخدمت نے 50ملین روپے مختص کیے ہیں جس میں 30ملین کی اسکالر شپ اور 20ملین دیگر ضروری اخراجات کے لیے رکھے گئے ہیں، کورس سال میں دو مرتبہ ہوں گے،Banoqabil.pkپر رجسٹریشن کی جائے گی۔ پہلے کورسز کا ٹیسٹ 3جولائی کو ہو گا۔

حافظ نعیم الرحمن نے کہا کہ الخدمت کا بنو قابل پروجیکٹ نوجوانوں کو خود انحصار بنانے کی جانب اہم قدم ہے،اس کا مقصد نوجوانوں کو اپنی فیملی اور ملک و قوم کے لیے مفید بنانا ہے، کراچی میں لاکھوں نوجوانوں کے لیے سرکاری ملازمتوں کے دروازے بند ہیں۔

انہوں نے مزید کہا کہ تعلیمی قابلیت کے مطابق مناسب ملازمتیں  نہ ملنے کی وجہ سے نوجوان معمولی کام کرنے پر مجبور ہیں، عارضی اور وقتی کام ہمارے نوجوانوں کا مقدر نہیں ہو سکتا۔ بنو قابل پروجیکٹ کے تحت مختلف کورسز کرنے والے نوجوان اپنا روزگار خود پیدا کرنے کے قابل بن جائیں گے۔

امیر جماعت اسلامی کراچی کا کہنا تھا کہ  سوسائٹی میں روزگار کے مناسب مواقع نہ ہونے کی وجہ سے نوجوان نا پسندیدہ سرگرمیوں میں مبتلا ہو جاتے ہیں، نوجوانوں کو مختلف اسکلز سکھاکر  ہنر مند بنانا حکومت کا کام ہے لیکن وہ مکمل لا تعلق ہے، حکومت نہ سڑکیں بنا رہی ہے نہ ٹرانسپورٹ کا نظام فراہم کر رہی ہے۔

حافظ نعیم الرحمن نے کہا کہ صرف اعلانات کیے جا رہے ہیں،صوبائی حکومت 14سال میں کراچی کے ساڑھے تین کروڑ لوگوں کے لیے 200بسیں لا کر ایسا جشن منا رہی ہے جیسے کوئی بہت بڑا کارنامہ انجام دیا ہو، جو حکومت عوام کو سہولیات نہ دے اس کے خلاف جدو جہد ذمہ داری بھی اور عبادت بھی۔