ادارے اور اعلیٰ فوجی افسر کیخلاف عمران خان کے الزامات ناقابل قبول ہیں، آئی ایس پی آر

راولپنڈی: پاک فوج کے شعبہ تعلقات عامہ ( آئی ایس پی آر ) نے کہا ہے کہ پاکستان تحریک انصاف کے چیئر مین اور سابق وزیراعظم عمران خان کے ادارے اور ایک اعلیٰ فوجی افسر پر الزامات غیر ضروری اورناقابل قبول ہیں۔ پاک فوج انتہائی پیشہ ور اور نظم وضبط کی حامل ہے۔

پاک فوج کے شعبہ تعلقات عامہ ( آئی ایس پی آر) کی طرف سے جاری کردہ بیان کے مطابق پاکستان تحریک انصاف کے چیئر مین عمران خان کی جانب سے ادارے اور خاص طور پر ایک اعلیٰ افسر کے خلاف بے بنیاد اور غیر ذمہ دارانہ الزامات قطعی طور پر ناقابل قبول اور غیر ضروری ہے۔ حکومت سے درخواست ہے کہ معاملہ کی تحقیقات کرے۔

آئی ایس پی آر کے بیان کے مطابق پاک فوج انتہائی پیشہ ور، نظم و ضبط کی حامل تنظیم ہونے پر فخر کرتی ہے، پاک فوج میں ایک مضبوط اور انتہائی موثر اندرونی احتسابی نظام ہے، وردی پوش اہلکاروں کے ذریعے غیر قانونی کارروائیوں کیلئے احتسابی نظام موجود ہے، مفادپرستوں کے فضول الزامات سے فوجیوں کی عزت کو داغدار کیا جا رہا ہے۔ ادارہ حسد سے اپنے افسروں اور سپاہیوں کی حفاظت کرے گا، آج ادارے پر لگائے گئے بے بنیاد الزامات انتہائی افسوسناک اور قابل مذمت ہیں۔

آئی ایس پی آر کے مطابق کسی کو بھی ادارے یا اس کے سپاہیوں کی بے عزتی کرنے کی اجازت نہیں دی جائے گی۔ اس کو مدنظر رکھتے ہوئے حکومت سے درخواست کی ہے کہ وہ معاملے کی تحقیقات کرے اور بغیر کسی ثبوت کے ادارے اور اس کے عہدیداروں کے خلاف ہتک عزت اور جھوٹے الزامات کے ذمہ داروں کے خلاف قانونی کارروائی شروع کرے۔