وزیر اعظم اور وزیر خارجہ کا معاشی حالات کے پیش نظر مزید سخت فیصلوں کا اشارہ

اسلام آباد: وزیراعظم شہباز شریف نے کہا ہے کہ ملک میں جاری بحران  کی وجہ پچھلی نااہل حکومت ہے، ان کی وجہ سے ہمیں معاشی بحران کا سامنا کرنا پڑا، مشکل وقت میں حکومت سنبھالنا پڑی، یہی وجہ ہے کہ معاشی بحالی کے لیے مزید مشکل فیصلے بھی کرنے پڑے تو کریں گے.

وفاقی کابینہ کے اجلاس کے بعد میڈیا سے گفتگو کرتے ہوئے وزیراعظم کا کہنا تھا کہ پٹرولیم نرخوں میں اضافہ ناگزیر ہوگیا تھا، جو ہم نے دل پر پتھر رکھ کر کیا- پٹرولیم مصنوعات میں بروقت اضافہ روک کر اور سبسڈی دے کر رہنے والی حکومت نے دراصل نئی حکومت کے لیے جال بچھایا تھا-

شہباز شریف نے کہا کہ ہم عوام کو ہرممکن ریلیف دینے کی کوشش کررہے ہیں- اسی سلسلے میں دو ہزار روپے فی گھرانہ دے رہے ہیں تاکہ پٹرولیم مصنوعات کی قیمتوں میں اضافے کا عوام پر بوجھ کچھ کم ہو سکے- وزیراعظم نے کہا کہ معاشی صورت حال بہت نازک ہے، اس لیے کچھ سخت فیصلے مزید بھی کرنے کی ضرورت پیش آئی تو کرنا پڑیں گے-

دوسری جانب  وزیر خارجہ اور پیپلز پارٹی کے چیئرمین بلاول بھٹو زرداری نے بھی آنے والے دنوں میں مزید  سخت معاشی حالات کا اشارہ دیا ہے۔ اپنی والدہ اور سابق وزیراعظم بینظیر بھٹو کی 69 ویں سالگرہ کے سلسلے میں ایک عوامی اجتماع سے خطاب کرتے ہوئے کہا کہ آنے والے دنوں میں مشکل معاشی حالات سخت ہونے والے ہیں۔

بلاول بھٹو کا کہنا تھا کہ سابق وزیراعظم عمران خان نے آئی ایم ایف کے ساتھ غلط معاہدہ کیا۔ ہم نے پاکستان کو ڈیفالٹ ہونے سے بچایا۔