سندھ کا 1700 ارب روپے سے زائدکا بجٹ پیش، تنخواہوں میں اضافے کا اعلان

کراچی:اسلام آباد: وزیراعلیٰ سندھ مراد علی شاہ نے صوبے کا 17 کھرب اور 13 ارب روپے کا بجٹ پیش کردیا، تنخواہوں میں 15 فیصد اور پنشن میں پانچ فیصد اضافہ سمیت پولیس کانسٹیبل کا گریڈ 5 سے بڑھا کر 7 کرنے کا اعلان کیا ہے۔

میڈیا رپورٹس کے مطابق سندھ اسمبلی کا اجلاس 50 منٹ تاخیر سے قائم مقام اسپیکر ریحانہ لغاری کی زیر صدارت شروع ہوا۔

 وزیر اعلیٰ سندھ نے اجلاس میں بجٹ 2022 تا20223 کا بجٹ پیش کرتے ہوئے کہا کہ مالی سال کا بجٹ (اخراجات) 1713 ارب جب کہ آمدنی 1679 ارب ہے، بجٹ میں 33 ارب کا خسارہ ہے، مجھے یہ اعزاز حاصل ہے کہ آج دسویں بار سندھ کا بجٹ پیش کررہا ہوں۔

مراد علی شاہ  کی بجٹ تقریر شروع ہوتے ہی تحریک انصاف کے ارکان اسمبلی نے شور شرابہ اور نعرے بازی شروع کردی جس پر وزیراعلی نے برہمی کا اظہار کرتے ہوئے اپوزیشن کو تنقید کا نشانہ بنایا اور اسی شور شرابے کے دوران بجٹ تقریر جاری رکھی۔

وزیر اعلیٰ سندھ نے بجٹ پیش کرتے ہوئے تقریر کرتے ہوئے کہا کہ کم جولائی سے ہی سرکاری ملازمین کی تنخواہوں میں 15 فیصد ایڈہاک الاؤنس بھی الگ سے لگایا جارہا ہے، اس وقت سندھ میں تمام صوبوں کی بہ نسبت پنشن کا تناسب سب سے زیادہ ہے، اگر کسی اور صوبے میں پنشن میں اضافہ ہوا تو ہم بھی کریں گے۔

مرادعلی شاہ کا کہنا تھا کہ اس بجٹ میں کوئی نیا ٹیکس نہیں لگایا، ہم فنانس بل پیش نہیں کریں  گے۔