اسلام آباد: 8 فروری کو ہونے والے عام انتخابات کے لیے ملک بھر میں انتخابی سامان عمل شروع ہو گیا ہے۔

ملتان میں قومی کے 6 اور صوبائی اسمبلی کے 12 حلقوں کے پریزائیڈنگ افسران کو سامان کی فراہمی کا آغاز کر دیا گیا ہے، پولنگ سامان فراہم کرنے کے لیے تین سینٹرز بنائے گئے ہیں، تمام پریذائیڈنگ افسران کو ریٹرننگ آفیسرز کے دفاتر سے پولنگ مٹیریل جس میں بیلٹ باکسز، بیلٹ پیپرز اور دیگر سامان پولیس اور دیگر قانون نافذ کرنے والے اداروں کی سیکیورٹی میں پولنگ اسٹیشنز پر بھجوایا جارہا ہے۔الیکشن کمیشن کے ضابطہ اخلاق کے مطابق تمام پولنگ اسٹیشنز پر پریذائیڈنگ  افسران کو عمل درآمد کی ہدایات جاری کی گئی ہیں

الیکشن کمیشن سندھ  کی جانب سے بھی انتخابی سامان کی پولنگ اسٹیشن تک ترسیل کا کام  جاری ہے۔ پشاورالیکشن کمیشن سے 3 مختلف مقامات پر الیکشن سامان کی ترسیل کا سلسلہ شروع ہوچکا ہے۔ ملتان میں ڈسٹرکٹ مانیٹرنگ آفس سے الیکشن کا سامان تقسیم کیا جا رہا ہے۔

دیر:امیر جماعت اسلامی پاکستان سراج الحق نے عوام سے اپیل کی ہے کہ ملک پر76برسوں سے مسلط کرپٹ حکمران طبقات اور خاندانوں کے اقتدار سے نجات کے لیے 8فروری کو ترازو پر مہر لگائیں۔

جلسے سے خطاب کرتے ہوئے سراج الحق نے کہاکہ 8فروری کو سچ اور جھوٹ کے درمیان مقابلہ ہوگا، ایک طرف جماعت اسلامی کی صورت میں قوم کی خدمت گار ،وطن کی نظریاتی سرحدوں کی محافظ، فلسطینیوں اور کشمیریوں سمیت امت کی ترجمان، استعمار مخالف، قانون اور انصاف کی حکمرانی کی خواہاں، کرپشن کی دشمن ، اقلیتوں کی محافظ، خواتین کی حرمت وتقدس کی حفاظت کی علمبردار اور نوجوانان پاکستان کی امیدوں کا مرکزاسلامی نظریاتی جماعت ہے۔

امیر جماعت اسلامی پاکستان کا کہنا تھا کہ ملک کو مہنگائی، کرپشن، جہالت ،  بدامنی اور تعصبات پر تقسیم کرنے والے خاندان، پارٹیاں ،ظالم جاگیردار، وڈیرے اور کرپٹ سرمایہ دار ہیں، فیصلہ عوام کے ہاتھ میں ہے ۔

انہوں نے مزید کہاکہ تعلیم اور صحت مند پاکستان کے لیے جماعت اسلامی کے امیدواروں کا انتخاب کرو، ہم وعدہ کرتے ہیں کہ پاکستان کو عظیم ریاست بنائیں گے۔ ملک میں وسائل کی بہتات ہے، چار موسم، بہتے دریا، طویل ساحل سمندر،سونا اگلتی زمینیں، معدنیات کے ذخائر اور سب سے بڑھ کر خوددار ، قابل ، بہادر 25کروڑ پاکستانی جن میں 65 فیصد نوجوان ہیں ۔

سراج الحق  نے کہا کہ دیر میں گزشتہ عرصے کے دوران کوئی ترقی نہیں ہوئی، علاقے میں انفراسٹرکچر تباہ حال، تعلیم سے محرومی، صحت کی سہولیات کی عدم دستیابی ہے۔ جماعت اسلامی کامیاب ہو کر دیر کو ترقی دے گی، عوام کے مسائل حل کریں گے۔ روڈ کارواں اور الیکشن مہم کا اختتام جماعت اسلامی کی کامیابی، پاکستان میں امن اور خوشحالی کی دعا اور فلسطینیوں اور کشمیریوں کی آزادی کے لیے دعا کے ساتھ ہو۔

اسلام آباد: الیکشن 2024 کی سیاسی سرگرمیوں پر 48 گھنٹے کی پابندی 6 اور 7 فروری کی درمیانی شب سے شروع ہوگی۔

انتخابی شیڈول کے مطابق انتخابی قوانین کے تحت انتخابی مہم کی کھڑکی منگل اور بدھ کی درمیانی شب بند ہو جائے گی۔

قانون کی خلاف ورزی کرنے والے امیدوار یا سیاسی جماعتیں انتخابی مہم پر پردے ڈالنے کے بعد قانونی کارروائی کا نشانہ بن سکتی ہیں۔

جیسے جیسے انتخابی پابندی کی مدت قریب آرہی ہے، سیاسی جماعتوں اور انتخابی امیدواروں نے اپنی انتخابی مہم تیز کردی ہے۔

پاکستان پیپلز پارٹی اپنی انتخابی مہم کا اختتام بھٹو کی آبائی سرزمین لاڑکانہ میں پاور شو سے کرے گی۔ پیپلز پارٹی لاڑکانہ کے میونسپل اسٹیڈیم میں جلسہ عام کا انعقاد کر رہی ہے جس سے پارٹی کے چیئرمین بلاول بھٹو زرداری خطاب کریں گے۔

پیپلز پارٹی کے جلسہ عام سے آصفہ بھٹو اور پارٹی کے دیگر مرکزی رہنما بھی خطاب کریں گے۔

پاکستان مسلم لیگ نواز قصور کے علاقے کھڈیاں میں پارٹی کے آخری انتخابی پاور شو کے ساتھ اپنی انتخابی مہم کا اختتام کرے گی۔

مسلم لیگ ن کے سپریم لیڈر میاں نواز شریف، شہباز شریف، مریم نواز اور حمزہ شہباز دوپہر 2 بجے ریلوے گراؤنڈ میں پارٹی کے جلسہ عام میں شرکت کریں گے۔

جلسہ گاہ میں پارٹی قائدین نواز شریف، شہباز شریف، مریم نواز اور حمزہ شہباز کے پوسٹرز آویزاں کردیئے گئے ہیں۔

سابق وزیراعظم شہباز شریف قصور کے حلقہ این اے 132 کھڈیاں سے مسلم لیگ ن کے امیدوار ہیں۔

اسلام آباد: پاکستان تحریک انصاف (پی ٹی آئی) نے پارٹی کے انتخابی نشان ‘بلے’ کی واپسی کے لیے سپریم کورٹ میں نظرثانی کی درخواست دائر کر دی ۔

پی ٹی آئی نے عدالت عظمیٰ سے بلے کے انتخابی نشان کی واپسی کی استدعا کرتے ہوئے عدالت سے 13 جنوری کے عدالتی فیصلے پر نظرثانی کی استدعا کی ہے۔

یہاں یہ بات قابل ذکر ہے کہ سپریم کورٹ نے اپنے فیصلے میں الیکشن کمیشن آف پاکستان (ای سی پی) کے 22 دسمبر کے حکم کو برقرار رکھا تھا جس میں پارٹی کو بلے کے نشان سے محروم کیا گیا تھا۔

پی ٹی آئی نے سپریم کورٹ سے پارٹی کا انتخابی نشان واپس کرنے کا پشاور ہائی کورٹ کا فیصلہ بحال کرنے کی استدعا کی ہے۔

درخواست کے مطابق سپریم کورٹ نے انٹرا پارٹی انتخابات کے حقائق کو صحیح تناظر میں نہیں لیا۔ پارٹی نے دلیل دی کہ “کسی سیاسی جماعت کا انتخابی نشان واپس لینا ووٹروں کے بنیادی حقوق کی خلاف ورزی ہے۔”

درخواست گزار نے موقف اختیار کیا کہ آئین شہریوں کو سیاسی جماعت بنانے اور الیکشن لڑنے کا حق دیتا ہے۔ درخواست میں کہا گیا ہے کہ الیکشن کمیشن پی ٹی آئی کا انتخابی نشان واپس لے کر اپنے اختیارات سے تجاوز کرتا ہے۔

سینئر وکلا حامد خان اور علی ظفر نے الیکشن کمیشن اور ہائی کورٹ میں شکایت کنندگان کو فریق بناتے ہوئے سپریم کورٹ میں درخواست دائر کی ہے۔

رجسٹرار آفس نے درخواست کو ڈائری نمبر 2423/2024 الاٹ کر دیا ہے۔

انہوں نے کہا کہ یہ الیکشن کمیشن کا فرض ہے کہ وہ پی ٹی آئی کو لیول پلیئنگ فیلڈ یقینی بنائے۔ درخواست کے مطابق الیکشن کمیشن نے ذمہ داروں کے خلاف کارروائی کرنے کے بجائے، پارٹی کے بانی کے خلاف جیل میں کارروائی شروع کر دی ہے ۔

درخواست گزاروں نے عدالت سے یہ بھی استدعا کی ہے کہ پارٹی سے ’بلے‘ کی واپسی کے معاملے کو اس کے حقیقی تناظر میں دیکھا جائے۔

چیف جسٹس قاضی فائز عیسیٰ کی سربراہی میں تین رکنی بنچ نے 13 جنوری کو اپنے فیصلے میں پی ٹی آئی کے انتخابی نشان کو برقرار رکھنے کی امیدوں کو بڑا دھچکا پہنچایا۔

اس کے نتیجے میں پی ٹی آئی کے امیدوار آزادانہ طور پر مختلف انتخابی نشانات کے ساتھ الیکشن لڑ رہے ہیں جبکہ پارٹی کو خواتین اور اقلیتوں کے لیے مخصوص نشستوں کا حق حاصل نہیں ہے۔

اسلام آباد : اوگرا نے 2 فروری سے سوئی ناردرن کے ٹیرف میں 35.1 اور سوئی سدرن کے ٹیرف میں 8.5 فیصد کا بڑا اضافہ کر دیا۔

اوگرا نے اضافے کا نوٹیفکیشن منظوری کے لیے وفاقی حکومت کو اطلاق کے لیے بھجوا دیا۔ نوٹیفکیشن کے مطابق سوئی ناردرن سسٹم پر گیس کی اوسط قیمت 1238.68 روپے سے بڑھا کر 1673.82 روپے فی ایم ایم بی ٹی یو کر دی گئی۔ سوئی ناردرن کو صارفین سے 180 ارب روپے مزید وصول کرنے کی اجازت دی گئی۔

سوئی سدرن کی گیس کی اوسط قیمت 1350.68 روپے سے بڑھا کر 1466.40 روپے فی ایم ایم بی ٹی یو کر دی گئی۔ سوئی سدرن کو صارفین سے 48 ارب روپے مزید وصول کرنے کی اجازت دی گئی۔

نوٹیفکیشن کے مطابق اوگرا سوئی کمپنیوں سے گیس چوری کی شرح کم کروانے میں ناکام رہی۔ اوگرا کے مطابق سوئی کمپنیوں نے گیس چوری کم کرنے کے لیے اوگرا کو ٹھوس منصوبہ پیش نہیں کیا اور رواں مالی سال گیس چوری سے سوئی ناردرن کو 14 ارب 77 کروڑ روپے کا نقصان ہوگا۔

اوگرا نے کمپنی کے منافع پر عائد 10 فیصد سپر ٹیکس کا بوجھ صارفین پر ڈالنے کی منظوری دے دی۔ حکومت نے یکم جولائی سے زیادہ منافع کمانے والی کمپنیوں سے سپر ٹیکس وصولی شروع کی تھی اور حکومت کی ہدایت تھی کہ ٹیکس وصولی کو صارفین پر منتقل نہ ہونے دیا جائے۔

سوئی ناردرن کو کرک میں دفتر کھولنے کی اجازت بھی دی گئی جس کے لیے 10 کروڑ روپے سالانہ کے اخراجات کی بھی منظوری دی گئی۔

ڈیرہ اسماعیل خان میں پیر کی صبح پولیس اسٹیشن پر دہشت گردوں کے حملے میں 10 پولیس اہلکار شہید اور 9 زخمی ہو گئے۔

پولیس نے بتایا کہ ڈی آئی خان کی تحصیل درابن میں دہشت گردوں نے ایک پولیس اسٹیشن پر حملہ کیا جس کے نتیجے میں 10 پولیس اہلکار ہلاک اور 9 زخمی ہوگئے۔

پولیس نے بتایا کہ چاروں طرف سے دہشت گردوں نے تھانے پر حملہ کیا، دستی بم پھینکے اور شدید فائرنگ کی۔

سیکیورٹی اہلکاروں نے جوابی کارروائی کی تاہم اندھیرے کا احاطہ کرتے ہوئے دہشت گرد فرار ہونے میں کامیاب ہوگئے۔ تمام زخمیوں کو علاج کے لیے ڈی ایچ کیو ہسپتال منتقل کر دیا گیا۔ پولیس اور سیکیورٹی فورسز نے علاقے کو گھیرے میں لے کر سرچ آپریشن شروع کردیا۔

یاد رہے کہ 12 دسمبر 2023 کو درابن تھانے پر دہشت گردوں نے حملہ کیا تھا جس میں تین پولیس اہلکار شہید ہوگئے تھے۔

 دہشت گردوں نے بارود سے بھری گاڑی تھانے کے مین گیٹ سے ٹکرا دی تھی۔ اس حملے میں کم از کم 16 سیکورٹی اہلکار زخمی بھی ہوئے تھے۔

کراچی: امیر جماعت اسلامی کراچی حافظ نعیم الرحمن نے کہا ہے کہ 8 فروری کو کراچی کے عوام ترازو پر مہر لگا کر تمام مافیاوں کو مسترد کردیں گے، ہم اقتدار میں آنے کے بعد پی ٹی آئی کے ساتھ ہونے والی زیادتیوں پر بھی آواز اٹھائیں گے، جماعت اسلامی ہی کراچی کے عوام کے لیے امید کی کرن ہے ۔

کشمیر کاروان ترازو کے شرکاء سے خطاب کرتے ہوئے  حافظ نعیم الرحمن نے کہاکہ  8 فروری کے دن کراچی میں ترازو امید کی کرن ثابت ہوگا،  شہر میں طویل عرصے تک بھتہ خوری ، بوری بند لاشوں کی سیاست ہوتی رہی، شہر کراچی ملک کی معیشت کو چلاتا ہے لیکن یہاں کے عوام کا استحصال کیا گیا ہے۔

امیر جماعت اسلامی کراچی کا کہنا تھا کہ  کراچی کے عوام اپنے ووٹ طاقت سے بھتہ خوری اور بوری بند لاشوں کی سیاست کو مسترد کردیں، انتخابی مہم جاری ہے ، بار ان رحمت ان ظالم اور کرپٹ ٹولوں کی وجہ سے بار ان زحمت بن گئی، اقتدار پر مسلط مافیاوں نے کراچی کے عوام کو بنیادی سہولیات میسر نہیں کی۔

انہوں نے کہاکہ  الیکشن کمیشن اور حکومت نے پی ٹی آئی کو دیوار سے لگایا گیا ہے، آزاد امیدواروں کو بھی پارٹیوں کے حق میں بٹھایا جارہا ہے، کراچی والے جان لیں کہ جماعت اسلامی کے علاوہ کسی بھی پارٹی کو ووٹ دیں گے تو وڈیروں اور جاگیرداروں کے حق میں جائے گا،  پی ٹی آئی کے سپورٹرز کا ووٹ بھی صرف ترازو ہے۔

مظفر آباد: آرمی چیف جنرل سید عاصم منیر نے کہا کہ پاک فوج ہر قسم کے خطرے سے بخوبی واقف ہے اور مؤثر جواب دینے کیلئے بھی ہمیشہ تیار ہے۔

پاک فوج کے شعبہ تعلقات عامہ (آئی ایس پی آر) کے مطابق نگران وزیراعظم انوارالحق کاکڑ اور آرمی چیف جنرل سید عاصم منیر نے مظفر آباد آزاد کشمیر کا دورہ کیا، یادگار شہداء پر پھولوں کی چادر چڑھائی، آرمی چیف نے عظیم قربانیاں دینے والے شہداء کو خراج عقیدت پیش کیا، آرمی چیف نے ساریان سیکٹر میں لائن آف کنٹرول کے ساتھ اگلے مورچوں کا بھی دورہ کیا۔

آئی ایس پی آر کے مطابق سیاسی وعسکری قیادت نے کہا کہ مقبوضہ کشمیر بھارتی مظالم کے سامنے کشمیریوں کا استقامت اور غیر متزلزل ایمان مثالی ہے، مقبوضہ کشمیر میں انسانی اور سلامتی کے بحران سے علاقائی امن اور استحکام کو شدید خطرہ ہے۔

انہوں نے کہا کہ پاکستان حق خودارادیت کی منصفانہ جدوجہد میں کشمیریوں کے ساتھ ہمیشہ کھڑا رہے گا، بھارت مقبوضہ کشمیر کی آبادی کو تبدیل کرنے کی کوشش کر رہا ہے اس طرح کی سازشیں کشمیری عوام کو اپنے جائز ہدف سے نہیں ہٹا سکتیں۔

آرمی چیف کو ایل او سی کے ساتھ تازہ ترین صورتحال کے بارے میں بھی بریفنگ دی گئی، آرمی چیف نے آپریشنل تیاریوں، جوانوں کے بلند حوصلے اور مؤثر ردعمل کی بھی تعریف کی۔

آرمی چیف سید عاصم منیر نے کہا کہ پاک فوج ہر قسم کے خطرے سے بخوبی واقف اور مؤثر جواب دینے کیلئے ہمیشہ تیار ہے، آرمی چیف نے پاکستان میں بھارت کی ریاستی سرپرستی میں دہشت گردی کا بھی تذکرہ کیا، آرمی چیف نے کہا کہ پاکستان ایسی تمام کوششوں کو بے نقاب کرتا رہے گا اور اپنے شہریوں کی حفاظت کو یقینی بنائے گا۔

آئی ایس پی آر کے مطابق ساریان سیکٹر آمد پر کور کمانڈر راولپنڈی نے آرمی چیف کا استقبال کیا

چیف آف آرمی اسٹاف نے کہا کہ ’ کسی بھی جارحیت یا علاقائی خودمختاری کی خلاف ورزی کا بھرپور قومی عزم اور فوجی طاقت کے ساتھ جواب دیا جائے گا، فوج خطرے کے مکمل اسپیکٹرم سے بخوبی واقف ہے اور مؤثر طریقے سے جواب دینے کے لیے ہمیشہ تیار ہے‘‘۔

اسلام آباد: جماعت اسلامی پاکستان کے امیرسراج الحق نے کہا کہ8فروری کو شیرکو پنجرے میں بند کردیں گے، جعلی تیر بھی ٹھس ہوجائے گا،لینڈ ڈرگ مافیا آٹا چینی چوروں کا پارلیمینٹ آنے سے راستہ روکیں گے۔

جلسے سے خطاب کرتے ہوئے سراج الحق نے کہاکہ بھاری قرضوں کے زمہ دار نواز و شہبازشریف ،زرداری اور بلاول کی جائیدادیں اثاثے بیچ کر یہ قرضے اتاریں گے ، ڈاکو راج پھر کبھی  نہیں آئے گا ،  اسلام آباد کے عوام نے فیصلہ سنا دیا ہے ریفرنڈم ہو گیا ہے۔

انہوں نے کہاکہ  آپکی حکومت آپکے ہاتھ میں ہو گی ۔

سراج الحق نے کہا کہ ہم آئیں گے، انصاف کا دور دورہ ہو گا ، کرپشن ، ڈاکو راج پھر کبھی  نہیں آئے گا ، پیپلز پارٹی اور مسلم لیگ ن والے چار چار بار امتحان میں ناکام ہوئے اب پھر کہتے ہیں کہ ہمیں امتحان میں فرسٹ ڈویژن دو ، 76 سال ہو گئے ہیں یہ اژدھا قوم کو ڈس رہے ہیں۔

انہوں نے مزید کہاکہ  اعلیٰ عدلیہ یہاں ہے مگر اسلام آباد کے بچے پانی کی بوند بوند کو ترستے ہیں ، علاج کی سہولت نہیں ملتی ، سکولز نہیں ہیں ، پوچھو سابقہ حکومتوں والوں سے کیوں قوم کو بنیادی حقوق سے محروم رکھا ۔ قوم کو اسی ہزار ارب روپے کا مقروض بنا دیا ، نظام عدالت کے حوالے سے پاکستان کا 129 واں نمبر ہے ، یعنی انصاف سے بھی حکمرانوں نے محروم رکھا ، عدالت ، پارلیمنٹ نیب سمیت تمام ادارے عوامی شنوائی میں ناکام رہے۔

کراچی: امیر جماعت اسلامی کراچی حافظ نعیم الرحمن نے کہا ہے کہ شہر میں ہونے والے بارش نے قبضہ مئیر کی ناقص کارکردگی کی پول کھول دی۔

انہوں نے ایک بیان میں کہا کہ بارش کے دوران عوام پریشان حال ہیں لیکن میئر کی جانب سے کسی قسم کے کوئی انتظامات نہیں کیے گئے، بارش میں نئی تعمیر شدہ سڑکیں اور سیوریج کا نظام مکمل تباہ ہوگیا۔

انہوں نے کہا کہ محکمہ موسمیات کی جانب سے بارش کی پیش گوئی کے باوجود نالوں کی صفائی کا کوئی انتظام نہیں کیا گیا۔عوام عام انتخابات سے قبل پیپلز پارٹی کے کراچی کو پیرس بنانے کے دعوے کی حقیقت دیکھ لیں۔

حافظ نعیم نے مزید کہا کہ مختلف علاقوں میں بارش کے فورا بعد جماعت اسلامی اور الخدمت کے رضاکار رییسکیو کے لیے موجود ہیں۔

لاہور: سابق وزیراعظم و صدر مسلم لیگ (ن)شہباز شریف نے کہا ہے کہ بارش سے کراچی جیسی حالت لاہور کی ہوتی تو الیکشن سے دستبردار ہوجاتا، تحریک انصاف والوں کو چاہیے کہ پی ٹی آئی کو ووٹ دینے کے بجائے اب ٹرانسپرنسی انٹرنیشنل کی رپورٹ پر ووٹ دیں۔

لاہور میں پریس کانفرنس کرتے ہوئے شہباز شریف نے کہا کہ دھاندلی زدہ حکومت نے ہم پر بدترین کرپشن کے الزمات لگائے، نواز شریف پر کوئی بھی کرپشن ثابت نہ کرسکا، دنیا کے کسی معاشرے میں کرپشن مکمل طور پر ختم نہیں ہوئی۔

انہوں نے کہا کہ الیکشن میں عوام بیلٹ بکس کے ذریعے ووٹ سے فیصلہ کریں گے، لگ رہا ہے ،8فروری کو عوام مسلم لیگ (ن)کو واضح مینڈیٹ دیں گے۔

شہباز شریف نے کہاکہ نوجوانوں کا مستقبل آئندہ انتخابات سے جڑا ہے، ٹرانسپرنسی انٹرنیشنل کی رپورٹ کا تعلق بھی براہ راست الیکشن سے ہے۔

شہباز شریف نے کہا کہ بلاول بھٹو جہاں سے چاہیں الیکشن لڑیں لیکن پیسے بانٹ کر ووٹ مانگنا ووٹ کی بدترین توہین ہے، اگر ووٹ خریدنے کی بات درست ہے تو یہ ووٹ کی عزت نہیں توہین ہے۔

انہوں نے کہا کہ بلاول بھٹو کے مناظرے کا چیلنج گزشتہ روز کراچی کی بارش میں بہہ گیا، کراچی میں بارش کے بعد اب بتائیں موازنہ ہوا یا نہیں؟ میں نے بلاول بھٹو سے کہا تھا کہ مناظرہ نہیں، موازنہ ہوناچاہیے جو گزشتہ روز ہوگیا۔

شہباز شریف کا کہنا تھا کہ نواز شریف نے 1997 میں پہلی موٹر وے بنائی، موٹر وے بنانے کی وجہ سے نواز شریف پر کرپشن کے الزامات لگے، کوئی بھی نواز شریف پر کرپشن کے الزامات ثابت نہیں کرسکا، آج موٹروے سے لاکھوں لوگ مستفید ہورہے ہیں۔

انہوں نے کہا کہ نواز شریف کے دور میں کرپشن کو شدید ضرب لگی، 2013 میں نواز شریف نے ووٹ کے ذریعے حکومت حاصل کی، 2013 میں پاکستان کا کرپشن انڈیکس 139 پر پہنچ چکا تھا، 2013 سے 2018 تک پاکستان میں سب سے بڑی سرمایہ کاری ہوئی۔

انہوں نے کہا چور ڈاکو کا ورد کرکے اس ملک میں وہ زہر گھولا گیا جسے سنبھالنا اب بہت مشکل ہے، میرے خلاف ایک دھیلے کی کرپشن ثابت ہو جائے تو اپنے کاغذات نامزدگی واپس لے لوں گا۔

انہوں نے بتایا کہ ثاقب نثار نے مجھے بلا کر کہا آپ نے بجلی کے لیے کیا کیا؟میں نے جوابا کہا آپ ٹھنڈے کمرے میں ایسے ہی بیٹھے ہیں؟۔

صدر ن لیگ نے کہا کہ نواز شریف ماضی کی تلخیاں بھلا کر آئے ہیں، عمران نیازی کہتا تھا میں ان کو چھوڑوں گا نہیں میں ان کو رلاؤں گا ایسی بات کبھی نواز شریف نے نہیں کی، اگر اللہ نے نواز شریف کو مینڈیٹ دیا تو شور اور افراتفری کو دفن کردیں گے۔

انہوں نے کہا کہ کروڑوں بچے اور بچیاں ووٹ ڈالنے جائیں گے، مستقبل اِس الیکشن سے جڑا ہے،ملک کا حکمران کون بنے گا، 8 فروری کو عوام فیصلہ کریں گے۔

شہباز شریف نے کہا کہ ہمارے دور میں کرپشن کم ہوئی ، ٹرانسپرنسی انٹرنیشنل سمیت عالمی ادارے بھی گواہی دے رہے ہیں، عمران خان کے دور میں کرپشن کا پیسہ ہر طرف چلا، پی ٹی آئی دور میں ایک اینٹ نہ لگی پھر بھی کر پشن انڈیکس بڑھ گیا، ٹرانسپرنسی کی رپورٹ سے ثابت ہوگیا کہ چور کون ہے، تحریک انصاف والے اب اپنی پارٹی کے بجائے ٹرانسپرنسی کی رپورٹ پر ووٹ دیں۔

صدر مسلم لیگ(ن)نے کہا کہ نواز شریف کے دور میں پاکستان میں بجلی کے منصوبے لگے، سی پیک کوریڈور بنے، پہلی اورنج لائن ٹرین کا آغاز ہوا، کوئلے سے بجلی بنانے کے منصوبے لگے، گیس سے بجلی بنانے کے مزید منصوبے بھی لگائے گئے۔

انہوں نے کہا کہ پچھلی حکومت بدترین دھاندلی اور جادو منتر کے ذریعے قائم ہوئی تھی، دھاندلی زدہ حکومت نے ہم پر بدترین کرپشن کے الزمات لگائے، دنیا کے کسی معاشرے میں کرپشن مکمل طور پر ختم نہیں ہوئی۔

کراچی: امیر جماعت اسلامی سراج الحق نے کہا ہے کہ اسٹیبلشمنٹ 2018 سے سبق سیکھتے ہوئے 8فروری کو غیرجانبدار رہے۔

سراج الحق نےغیر ملکی میڈیا کو انٹرویو دیتے ہوئے کہا کہ ملک آگے لے جانے کے لئے سیاسی افہام و تفہیم ناگزیر ہے، الیکشن کے بعد سیاسی جماعتوں اور اسٹیبلشمنٹ کو بٹھائیں گے، کوشش ہوگی مسائل سے نکلنے کے مشترکہ لائحہ عمل پر اتفاق کروا سکیں، سیاسی عدم استحکام نے معاشرے کو بے انتہا نقصان پہنچایا۔

ان کا کہنا تھاکہ الیکشن شفاف ہوں گے تو شراکت داروں کو بٹھا سکیں گے، شفاف الیکشن کے باعث ہی مشترکہ لائحہ عمل پر اتفاق ممکن ہوگا، اگر الیکشن شفاف نہیں ہوتے تو ملک میں فساد اور ہنگامے ہوں گے، الیکشن میں سب جماعتوں کو یکساں ماحول مہیا کیا جائے۔

سراج الحق کا کہنا تھا اسٹیبلشمنٹ 2018 سے سبق سیکھتے ہوئے غیرجانبدار رہے، 2018 میں اسٹیبلشمنٹ نے حکومت بنائی، گزشتہ الیکشن میں مداخلت کے باعث اسٹیبلشمنٹ کو تنقید کا سامنا ہے،اسٹیبلشمنٹ گزشتہ الیکشن سے سبق سیکھتے ہوئے 8 فروری غیر جانبدار رہے جو بھی حکومت بنے گی وہ فوج کو ساتھ لے کر چلے گی۔ حکومت یا اپوزیشن میں بیٹھنے کا فیصلہ الیکشن کے بعد کریں گے، الیکشن میں بہت سی چھوٹی بڑی جماعتیں پارلیمنٹ میں آئیں گی، جماعت اسلامی نے 700 سے زائد امیدواروں کو الیکشن میں اتارا ہے ۔

ان کا کہنا تھا کہ جماعت اسلامی نے انقلابی منشور دیا ہے جو فلاحی ریاست کے لئے ناگزیر ہے، انتخابات میں عوام جماعت اسلامی کو متبادل کے طور پر دیکھ رہے ہیں، قانون کی حکمرانی جماعت اسلامی کے منشور کا بنیادی نقطہ ہے، ملک میں دینی جماعتوں کے اتحاد کا تجربہ بہتر نہیں رہا، جماعت اسلامی نے اتحاد کے بغیر خود کو متبادل کے طور پیش کیا ہے۔

امیر جماعت اسلامی کا مزید کہنا تھا کہ تشدد کا راستہ اپنانے والوں کو قانون کے مطابق نمٹا جائے، افغانستان، ایران، پاکستان بات چیت سے خطے میں امن لاسکتے ہیں، بانی پی ٹی آئی کو کوئی مشورہ نہیں دینا چاہتا ہوں۔

اسلام آباد: نیپرا نے بجلی کی قیمت میں 4 روپے 56 پیسے فی یونٹ اضافہ کردیا۔

نیشنل الیکٹرک اینڈ پاور ریگولیٹری اتھارٹی (نیپرا) کی جانب سے بجلی مہنگی کرنے کا نوٹیفکیشن جاری کردیا گیا۔

نیپرا نے سی پی پی اے کی درخواست پر سماعت کی تھی۔ سی پی پی اے نے بجلی کے فی یونٹ کی قیمت میں 5 روپے 62 پیسے اضافے کی درخواست کی تھی۔ اعلامیے کے مطابق بجلی دسمبر کی فیول پرائس ایڈجسٹمنٹ کی مد میں مہنگی کی گئی ہے۔

 بجلی صارفین پر 39 ارب 80 کروڑ روپے کا اضافی بوجھ پڑے گا۔ اضافہ دسمبر کی ماہانہ فیول ایڈجسٹمنٹ کی مد میں کیا گیا ہے۔

بجلی صارفین کو فروری کے بلوں میں اضافی ادائیگیاں کرنا ہوں گی۔ قیمتوں کا اطلاق ایک ماہ کے لیے ہوگا۔ بجلی کی قیمتوں میں اضافے کا اطلاق  الیکٹرک وہیکل چارجنگ اسٹیشنز پر نہیں ہوگا۔

بجلی کی فی یونٹ قیمت میں 4 روپے 56 پیسے کے اضافے کا اطلاق کے الیکٹرک کے صارفین پر بھی نہیں ہوگا۔

اسلام آباد: دورانِ عدت نکاح کیس میں بانی پی ٹی آئی عمران خان اور بشریٰ بی بی کو 7، 7 سال قید کی سزا سنا دی گئی۔

گزشتہ روز تقریباً 14 گھنٹے کی سماعت کے بعد جج قدرت اللہ نے عدت میں نکاح سے متعلق کیس کا فیصلہ محفوظ کیا تھا، جس میں معزز جج نے ملزمان کو پیش کرنے کا حکم دیا۔ اس موقع پر بانی پی ٹی آئی عمران خان اور ان کی اہلیہ بشریٰ بی بی کو عدالت کے روبرو پیش کیا گیا۔

عدالت نے غیر شرعی نکاح کا جرم ثابت ہونے پر عمران خان اور بشریٰ بی بی کو 7، 7 سال قید کی سزا کا حکم سنا دیا۔ عدالت نے دونوں پر 5،5 لاکھ روپے جرمانہ بھی عائد کر دیا۔

اسلام آباد:الیکشن کمیشن کمیشن آف پاکستان (ای سی پی) نے ضابطہ اخلاق کی خلاف ورزی پر نوٹس لیتے ہوئے مختلف امیدواروں کو جرمانے اور خلاف ورزیوں پر ازخود طلب کرلیا۔

ترجمان الیکشن کمیشن کے مطابق عام انتخابات 2024 میں ضابطہ اخلاق کی خلاف ورزیوں پر الیکشن کمیشن نے نوٹس لے لیا جبکہ مختلف امیدواروں کو جرمانے اور خلاف ورزیوں پر ازخود طلب کرلیا۔

ضابطہ اخلاق کی خلاف ورزی پر ڈسٹرکٹ مانیٹرنگ آفیسر (ڈی آر او)کوہاٹ نے کارروائیاں کرتے ہوئے این اے 35 کے آزاد امیدوار نور اسلم آفریدی کو 5 ہزار اور این اے 35 کے ہی آزاد امیدوار فواد اللہ خان آفریدی کو 10 ہزار جرمانہ کردیا۔

اس کے علاوہ پی کے 90 کے اے این پی کے امیدوار یعقوب خان کو 5 ہزار جرمانہ کیا گیا جبکہ اسی حلقے پی کے 90 کے آزاد امیدوار جنید اللہ آفریدی کو 10 ہزار جرمانہ کیا گیا۔

ترجمان الیکشن کمیشن کے مطابق مختلف اضلاع میں مانیٹرنگ ٹیموں نے ممنوعہ تشہیری ہورڈنگزاورمواد بھی ہٹائے۔

اسلام آباد: الیکشن کمیشن نے انتخابات 2024ء کیلئے ملک کے تمام حلقوں کے بیلٹ پیپرز کی چھپائی مکمل کرلی، 31 اضلاع کے علاوہ باقی تمام اضلاع میں بیلٹ پیپرز کی ترسیل بھی مکمل کرلی گئی، قومی اسمبلی کیلئے سبز اور صوبائی اسمبلی کیلئے سفید کاغذ استعمال کیا گیا۔

بیلٹ پیپرز کی طباعت کے حوالے سے الیکشن کمیشن نے بریفنگ میں بتایا گیا کہ بلوچستان کے حلقوں کے بیلٹ پیپرز کی ترسیل مکمل ہوگئی، سیکیورٹی خدشات اور سخت موسم والے علاقوں میں فضائی راستے سے ترسیل کی جارہی ہے۔

میڈیا ذرائع کی رپورٹ کے مطابق 14 جنوری سے شروع ہونیوالا طباعت کا کام 2 فروری کو مکمل کرلیا گیا، سپریم کورٹ کے حکم پر قومی اسمبلی کے 11 اور صوبائی اسمبلیوں کے 5 حلقوں کے بیلٹ پیپرز دوبارہ چھاپے گئے، ان 16 حلقوں کے پرانے بیلٹ پیپرز کو ضابطہ اخلاق کے مطابق تلف کردیا جائے گا۔

الیکشن کمیشن حکام کی جانب سے بریفنگ میں بتایا گیا کہ ای سی پی حکام کے مطابق اس مرتبہ 26 کروڑ بیلٹ پیپر چھاپے گئے ہیں، 2018ء کی نسبت 2024ء میں امیدواروں کی تعداد 54.74 فیصد زیادہ اور خصوصی کاغذ کی ضرورت 195 فیصد زائد ہے، بیلیٹ پیپرز کا سائز کم کرکے خصوصی کاغذ کی ضرورت 2400 ٹن سے کم کرکے 2177 ٹن تک لائی گئی ہے۔

حکام کے مطابق بیلٹ پیپرز میں سے 5 فیصد سنگل کالم، 50 فیصد ڈبل کالم، 30 فیصد 3 کالم، 11.15 فیصد 4 کالم اور 2.4 فیصد 5 کالم بیلٹ پیپرز چھاپے گئے ہیں، بیلٹ پیپرز کے ساتھ اس مرتبہ فارم 45 بھی پرنٹ کرکے بھیجا جارہا ہے۔

عام انتخابات کیلئے پولنگ 8 فروری کو ہوگی، جس کیلئے سیاسی جماعتوں اور آزاد امیدواروں کی جانب سے انتخابی مہم جاری ہے، انتخابی مہم کا وقت 6 فروری کی رات 12 بجے ختم ہوجائے گا۔

اسلام آباد: الیکشن کمیشن نے عام انتخابات ہر صورت 8 فروری کو ہی کرانے کا فیصلہ کرلیا ہے۔

 تفصیلات کے مطابق چیف الیکشن کمشنر سکندر سلطان راجا کی زیر صدارت اجلاس ہوا، اجلاس میں آئی جی اور چیف سیکرٹری خیبرپختونخوا، آئی جی بلوچستان پولیس اور چیف سیکرٹری بلوچستان، نگران وفاقی وزیر داخلہ گوہر اعجاز اور سیکرٹری داخلہ آفتاب درانی بھی شریک ہوئے۔

میڈیا سے گفتگو کرتے ہوئے نگران وفاقی وزیر داخلہ گوہر اعجاز کا کہنا تھا کہ الیکشن 8 فروری کو ہیں، اس کے انعقاد پر کسی کو ابہام نہیں ہونا چاہیے، الیکشن کا انعقاد ہر صورت نگران حکومت اور الیکشن کمیشن یقینی بنائےگا، 8 فروری کو الیکشن ہر صورت میں ہوں گے۔

اجلاس میں خیبر پختوانخوا اور بلوچستان کی سکیورٹی صورتحال پر غور کیا گیا، دونوں صوبوں میں سکیورٹی کی صورتحال پر متعلقہ اداروں سے رپورٹ طلب کی گئی تھی۔

واضح  رہے کہ خیبر پختونخوا میں ایک امیدوار کی ہلاکت اور بلوچستان میں بے امنی کے واقعات کے بعد الیکشن کمیشن میں اہم اجلاس طلب کیا گیا تھا۔

اس سے قبل نگران وزیر داخلہ گوہر اعجاز کا کہنا تھا یقینی بنایا جا رہا ہے کہ انتخابات کیلئے پرامن اور سازگار ماحول فراہم کیا جائے۔