قونصلیٹ پرحملہ: چینی پولیس کے 7 رکنی وفد کی کراچی آمد

قونصلیٹ پرحملہ: چینی پولیس کے 7 رکنی وفد کی کراچی آمد

December 07, 2018 - 18:05
Posted in:

کراچی میں چین کے قونصل خانے پر دہشت گردی کی ناکام واردات کے بعد صورتحال کا جائزہ لینے کے لئے چینی پولیس کے کاؤنٹر ٹیررازم ڈپارٹمنٹ کا 7 رکنی وفد کراچی پہنچا گیا ہے۔ وفد کے ارکان نے جائے وقوعہ کا معائنہ کیا، سی ٹی ڈی افسران اور تحقیقاتی پولیس افسران سے بریفنگ لی اور شہید پولیس ملازمین کے لواحقین کو30،30 لاکھ روپے کے امدادی چیک دیئے۔ وفد نے کراچی پولیس آفس کا دورہ بھی کیا اور ایڈیشنل آئی جی کراچی کی سربراہی میں پولیس کے تفتیشی افسران سے ملاقات کی۔ چینی قونصل خانے پر ناکام دہشت گردی کے مقدمہ کی نگرانی کرنے والے ڈی آئی جی ساؤتھ جاوید عالم اوڈھو، ایس ایس پی پیر محمد شاہ، ایس ایس پی فارن سیکورٹی بشیر بروہی، دیگر افسران اور شہید اہلکاروں کے اہلخانہ بھی چینی وفد سے ملاقات میں موجود تھے۔ چینی وفد نے بعدازاں سی ٹی ڈی کے دفاتر پہنچ کر کاؤنٹر ٹیررزم ڈپارٹمنٹ کے افسران سے ملاقات کی۔ چینی پولیس حکام نے قونصلیٹ پر دہشت گردوں کی کارروائی کے دوران شہید ہونے والے دو اہلکاروں کے لواحقین کی امداد کیلئے چینی پولیس کی جانب سے فی کس 30 لاکھ روپے کی امداد کے چیک دیئے۔ وفدکے ارکان کا کہنا تھا کہ کراچی پولیس کے دونوں اہلکاروں نے قربانیاں دے کر پولیس فورس اور پاکستان کا نام روشن کیا۔ ان کی کوشش سے چینی قونصلیٹ پر دہشت گردی ناکام ہونے سے پاکستان اور چین کے مابین رشتہ مزید مضبوط ہوا ہے۔ کراچی پولیس حکام سے بات چیت کرتے ہوئے چینی پولیس حکام نے کہا کہ چین کی وزارت داخلہ اور پولیس کراچی پولیس شہید اہلکاروں کے شکر گزار ہیں۔شہید اہلکاروں کے لواحقین کیلئے چینی قونصلیٹ کی جانب سے بھی فی کس 30 لاکھ روپے کی امداد دی جا چکی ہے۔ چین کے شہری بھی شہیدوں کے لواحقین کیلئے فنڈ ریزنگ کررہے ہیں اور مزید غیرمعمولی امدادی رقم لواحقین کو دی جائے گی۔ کراچی پولیس چیف کی ٹیم نے وفد کے ارکان کو چینی قونصلیٹ پر دہشت گردی کی تفتیش کے حوالے سے آگاہی دی۔بشکریہ جنگbody {direction:rtl;} a {display:none;}