پشاور…بارشوں اورسیلاب سے خیبرپختونخوا،پنجاب، گلگت بلتستان اور آزاد کشمیرمیں جاں بحق افراد کی تعداد230سے تجاوز کر گئی ہے۔متاثرہ علاقوں میں ہزاروں افراد امداد کے منتظر ہیں ۔ نوشہرہ کے دریائے کابل میں طغیانی سے ہزاروں افراداپنے مکانوں کی چھتوں پر پناہ گزین ہیں۔طوفانی بارشوں سے گلگت بلتستان کا ملک بھر سے زمینی رابطہ منقطع ہوگیا ہے ۔گلگت میں سیلابی ریلے سے وزیر اعلیٰ ہاؤس اور سی ایم سیکریٹریٹ بھی زیر آب آگیا ہے ۔بارگو بالا اور باگو پائن کے دونوں رابطہ پل سیلاب میں بہہ جانے سے چھ ہزار افراد محصور ہو گئے ہیں ۔بارش کاپانی جوتل سمیت آئی ڈی پیز کیمپوں میں داخل ہوگیا ہے ،متاثرین کھلے آسمان تلے امداد کے منتظر ہیں ۔چلاس میں مکان گرنے سے خاتون سمیت دو افراد ہلاک ہوگئے ۔بسین میں سیلابی ریلے میں پھنسے رینجرز کے14اہلکاروں کو نکال لیا گیا۔خیبرپختونخوا میں صورتحال اور بھی سنگین ہوگئی ہے۔دریائے کابل میں دریائے سوات سے آخری ریلا داخل ہوگیا ہے۔محکمہ آبپاشی کے مطابق اس وقت دریائے کابل پر نوشہرہ کے مقام پر چار لاکھ کیوسک پانی گزر رہا ہے۔ سیلابی ریلے سے نوشہرہ مردان روڈ اور ریلوے پل زیر آب آگئے ہیں ۔ سیکڑوں متاثرین گھروں کی چھتوں پر چڑھے امداد کے منتظر ہیں ۔اٹک پل کے قریب جی ٹی روڈ زیر آنے سے پنجاب اور نوشہرہ کا زمینی رابطہ منقطع ہوگیا ہے۔سیلاب سے بجلی اور مواصلات کا نظام درہم برہم ہوگیا ہے۔ڈی پی او نوشہرہ نثارتنولی کے مطابق امداد کیلئے پاک فوج کے ہیلی کاپٹرز علاقے میں پہنچ گئے ہیں۔ڈیرہ اسماعیل خان میں پاک فوج امدادی کاموں میں مصروف ہے۔ تحصیل پہاڑپور میں سیم نالہ ٹوٹنے سے پانی رنگپور اور پہاڑ پور میں پانی داخل ہو گیا ہے ۔کوہاٹ میں مکان کی چھت گرنے سے ایک شخص جاں بحق اورچار زخمی ہوگئے،جس کے بعد کوہاٹ میں جاں بحق افراد کی تعداد29 ہوگئی ہے ۔خوشحال گڑھ کے قریب رابطہ پل ٹوٹنے سے جنوبی اضلاع کا پنجاب کے ساتھ رابطہ منقطع ہوگیا ہے۔بٹ گرام کے علاقے ککڑشنگ میں پل پانی میں بہہ جانے سے علاقے کا زمینی رابطہ منقطع ہے۔مکان گرنے سے ایک شخص زخمی اور ایک مسجد شہید ہوگئی ۔مانسہرہ کے دریائے کنہار میں اونچے درجے کا سیلاب ہے۔ ناران سے بالاکوٹ تک سو سے زائد مکانات اورہوٹل دریا برد ہوگئے ہیں۔ تحصیل بالا کوٹ میں شاہراہ کاغان متعدد مقامات پر تباہ ہوگئی۔چارسدہ میں پانی میں پھنسے افراد کو نکالنے کیلئے ہیلی کاپٹراور کشتیوں کے ذریعے ریسکیو آپریشن جاری ہے۔ادھرٹانک میں متاثرہ افراد نے احتجاجی مظاہرہ کیا ۔باجوڑ ایجنسی میں شدید بارشوں سے6 افراد ہلاک اور22 زخمی ہوئے ہیں ۔
