مظفر آباد…وادی نیلم سے آنے والا سیلابی ریلا دریائے جہلم میں داخل ہونے کے بعد مظفر آباد سے ہوتا ہوا منگلاڈیم کی جانب بڑھ رہاہے۔منگلاڈیم میں پانی کی سطح مسلسل بڑھ رہی ہے اورڈیم کے اسپل وے کھول دیے گئے ہیں ۔دوسری طرف قریبی دیہات سے لوگوں کی منتقلی کے لیے فوج کی مدد لی جارہی ہے ۔وادی نیلم سے آنیوالا سیلابی ریلا مظفرآباد کے مقام پر دریائے جہلم میں داخل ہواجس کے بعد دریائے نیلم میں پانی کی سطح بتدریج کم اور منگلا ڈیم میں مسلسل بلند ہورہی ہے ۔مظفر آباد میں ہٹیاں کے مقام پر زلزال جھیل کے بند کا ایک حصہ ٹوٹ گیاجس کے بعد لودھی آباد کے علاقے سے لوگوں کو محفوظ مقام منتقل کیا جارہا ہے ۔مظفرآباد میں گاؤں ہوتھلہ میں لینڈ سلائڈنگ کے سبب کئی مکانات خالی کرالیے گئے ۔ادھر ڈپٹی کمشنر منگلا ڈیم کے مطابق ڈیم کا لیول1205 فٹ سے تجاوزکررہاہے۔منگلا ڈیم میں پانی کی سطح بڑھنے سے ملحقہ آبادیوں کو شدید خطرات ہیں۔صورت حال کو مانیٹر کرنے کیلئے مظفرآباد میں کنٹرول روم قائم کردیا گیا ہے۔نہر اپر جہلم کے ساتھ واقع دیہات کے مکینوں کو محفوظ مقامات پر منتقل کردیاگیاہے جب کہ دو دیہات میں پھنسے افراد کو نکالنے کے لیے فوج کی مدد لی جارہی ہے۔
