| لاہور(پی پی آئی)پاکستان کرکٹ ٹیم کے سابق کپتان وسیم اکرم نے قومی ٹیم میں استحکام پیدا کرنے کی ضرورت پر زور دیتے ہوئے بورڈ سے نئی ٹیم پر اعتماد کرنے اور اسے وقت دینے کا مطالبہ کیا ہے۔ انہوں نے کہا پاکستانی کرکٹ کا سب سے بڑا مسئلہ تسلسل کی کمی ہے ،کسی کو خبر نہیں ہوتی کہ کل پاکستان کرکٹ میں کیا پیش آئے گا،کھلاڑی بے خوف و خطر فیصلے کرتے ہیں اور اپنے مستقبل کی منصوبہ بندی نہیں کرتے تاہم امید ہے کہ لیڈز کی فتح ان کے رویہ میں تبدیلی پیدا کرے گی۔ انہوں نے کہا کہ شاہد آفریدی کو ایک سال کیلئے کپتان بنایا گیا اور وہ اچانک صرف ایک ٹیسٹ کھیل کر ریٹائر ہوگئے، یہ ایک لطیفہ ہے۔ یونس خان اور محمد یوسف کی واپسی کے بارے میں انہوں نے کہا اس سے صرف ٹیم کی پیش رفت میں رکاوٹ پیدا ہوگی اور اس مرحلے پر پیچھے مڑ کر نہ دیکھا جائے۔ انہوں نے کہا کہ سلمان بٹ ایک پراعتماد،اچھا قائد اور باصلاحیت کھلاڑی ہے،میرا خیال ہے کہ اگر وہ لیڈز ٹیسٹ میں عمدہ کارکردگی نہ دکھاتا تو بورڈ کی جانب سے یونس اور یوسف کو واپس بلالیا جاتا اور کسی اور کپتان کا تقرر کیا جاتا۔ |
|
